Zlatan Ibrahimovic është në listën e futbollistëve të grumbulluar për ndeshjen kundër Spal nesër, por kushtet e tij fizike dhe stërvitja jo optimale do ta bëjnë ta nisë transfertën nga pankina. Pa të në fushë, kanë ardhur 6 gola në dy ndeshje në kampionat, ndaj Lecce dhe Roma, dhe vendin e tij si solist e ka zënë me meritë kroati Ante Rebic.
Këtë sezon Zlatan Ibrahimovic e ka nisur vetëm dy herë ndeshjen nga pankina ndërsa të gjitha sfidat e tjera, trajneri Pioli nuk e ka kursyer bomberin me origjinë boshnjake. Por tani janë shtuar dilemat nëse kuqezinjtë duhet ta mbajnë Ibrën, pasi nëse konfirmohet trendi i ndeshjeve të fundit, duket se Milan është më mirë pa të.
Rebic si sulmues i parë, veç përjashtimit në Kupën e Italisë ndaj Juventus, nuk ka gabuar në thuajse asgjë. Fatal pranë portës dhe i saktë në pasimet në thellësi. Zgjidhjet e kroatit kanë vënë në pah edhe treshen e mesfushorëve pas krahëve, pasi Bonaventura, Calhanoglu e Castillejo kanë shënuar të gjithë në dy ndeshjet e fundit. Zlatan Ibrahimovic tani nuk është i pazëvendësueshëm.
