Ministri i Diasporës Pandeli Majko teksa ka komentuar vizitën e kryeministrit Edi Rama në Prishtinë deklaron se Kosova kishte shumë nevojë në këto momente për vizitën e anjë autoriteti të lartë nga Tirana pasi situata atje është shumë e ndërlikuar.
Gjatë një interviste në “A-Show”, Majko deklaroi se vizita e Ramës në Kosovë nxiti një funksionalitet të brendshëm të jetës politike pasi sipas tij situata atje është e kontraktuar.
“Situata është shumë e komplikuar. Kosova është zhytur në një krizë institucionale. BE nuk e konsideron presidentin si pjesë e negocimit. E tillë është situata. Qeveria funksionon në bazë të votave të deputetëve serbë.
Vizita e kryeministrit erdhi menjëherë pas kësaj situate. Gjëja më normale. Problemi e kishte të nevojshme vizitën e një autoriteti të lartë shqiptar. Ajo nxiti një funksionalitet të brendshëm të jetës politike pasi situata në Kosovë është e kontraktuar. Jam kundër asaj që thonë se Rama do të bashkonte palët, pasi as ai vetë nuk i beson”, tha Majko, ish kryeministri i vendit gjatë krizës së luftës në Kosovë.
Lidhur me padinë e ngritur nga kryeministri Edi Rama ndaj ish-kryeministrit të Kosovës Ramush Haradinaj, i pyetur nëse do të bënte të njëjtin akt që bëri edhe kryeministri, Majko u shpreh i prerë: “As që diskutohet që jo”.
/En.Br./Fjala.al
