Deputeti Andi Përmeti nga foltorja e Kuvendit teksa ka kërkuar fjalën për procedurë e ka cilësuar tallje kohën e vënë në dispozicion nga Granoz Ruçi për të diskutuar mbi ligjet e sjella për votim në Kuvend. Në fjalën e tij ai kërkoi ti rikthehet debati parlamentit, pasi sipas tij kjë është e nevojshme.
“Për procedurë. Sot ne jemi 9 ditë mbasi është mbyllur gjendja e jashtëzakonshme dhe përsëri nuk kemi të drejtën e fjalës në parlament. Ju sillni nga 15 ligje për të votuar çdo seancë dhe ne kemi të drejtë të flasim 2 minuta gjithsej, pra diku te 8 sek për ligj. Kjo është tallje.
Unë e kuptoj situatën e vështirë të shkaktuar nga Covid, mirëkuptoj edhe mbledhjet online të komisioneve sepse ruajmë distancimin fizik, por ne këtu mblidhemi rreth 140 frymë në një sallë dhe qëndrojmë 4 orë, ka raste dëgjojmë 1 orë e gjysmë Ramën, ka raste rrimë edhe më shumë se 4 orë. Pra ne jemi këtu, me njeri tjetrin”, u shpreh Përmeti.
Më tej ai shtoi se, “Nëse ju mendoni që një orë ose 2 orë me shumë në këtë sallë mbasi kemi ndenjur 4 orë mund të sjell shpëtimin nga Covid, unë ju mirëkuptoj, por unë nuk e besoj. Sfidoj publikisht, të dal një mjek dhe të të thotë po qëndrove 4 orë rrezik s’ka, po qëndrove 5 ose 6 ka rrezik.
Pra t’i rikthejmë parlamentit debatin sepse është nevojshme dhe ju vet si kryetar parlamenti duhet ti jepni rëndësinë e debatit kësaj salle se pa të, kjo sallë vetëm me ngritje kartoni nuk ndryshon shumë nga ajo e para 90-s”.
I menjëhershëm ka qenë edhe reagimi nga Kryetari i Kuvendit Gramoz Ruçi i cili e cilësoi retorikën e tij si të gabuar.
“E keni absolutisht gabim retorikën tuaj. Unë të respektoj se jemi pjesë e kësaj salle. Por respektoj më shumë ekspertët. Parlamenti i Shqipërisë nuk bën asgjë më pak se parlamentet e vendeve homologe.
Ju jetoni këtu në Shqipëri, numri i të infektuarve është rritur. Shembull më të mirë jemi ne, që nuk është as koha as momenti që të shkujdesemi nga masa. Duke shpërdoruar fjalën ne japim shembullin më të keq”, tha Ruçi./Bl.Ba/Fjala.al
