Gjeogjina Kuli, shefja e Infektivit të Pediatrisë ka folur rreth gjendjes shëndetësore të foshnjës së infektuar me koronavirus.
Mjekja Kuli tha se gjendja shëndetësore e tij deri më tani paraqitet e stabilizuar dhe nuk ka vështirësi në frymëmarrje. Ndërkohë bëri me dije se së bashku me foshnjën, trajtim spitalor është duke marrë edhe nëna e tij.
“Deri tani janë referuar pak raste të rënda te fëmijët. Asnjëherë nuk mund të flasim me siguri 100% që fëmijët e kalojnë lehtë. Ka edhe fëmijë me sëmundje shoqëruese, sëmundje kronike. Nëse ekspozohen ndaj virusit mund ta kalojnë më rëndë sëmundjen dhe mund të paraqesin komplikacione. Po kështu edhe moshat e vogla, ashtu si në rastin e foshnjës që kemi të hospitalizuar që erdhi me temperaturë të lartë dhe prekje të mushkërisë. Deri tani fëmija është mirë, ruan parametrat e tij jetikë, nuk ka temperaturë prej 24 orësh, pi mirë, nuk ka shenja të vështirësisë në frymëmarrje. Uroj të mbetet deri në fund kështu,“-u shpreh ajo./Re.Gu/Fjala.al
