Pediatrja e njohur Lira Gjika përmes një statusi në Facebook ka shpjeguar frikën e fëmijëve nga mosha 6 deri 11 vjeç.
Për pediatren, kjo frikë është normale dhe nuk është kapriço apo tekë.
Sipas saj kjo është mosha ku njeriu fillon të përballojë me forcat e veta jetën, realitetin, frikrat dhe gëzimet.
Si këshillë për më të rriturit që kujdesen për fëmijët e kësaj moshe, Gjika jep idenë se ata duhet t’i mbështesin dhe t’iu shpjegojnë se edhe ata vetë janë ndjerë kështu në këtë moshë.
Statusi i plotë
Frika e moshës 6-11 vjec
Frika e kësaj periudhe nuk ka të bëjë me të diturin e gjërave, por me procesin e rritjes dhe ndjeshmërinë e lartë të shqisave. Kjo frikë është normale dhe nuk është kapricco apo tekë. Në fakt djali dhe vajza e kësaj moshe mëson si të përballojë e zgjidhë vetë situatat. Është mosha kur njeriu mendon, kupton dhe fillon të përballojë me forcat e veta jetën, realitetin, frikrat dhe gëzimet. Mëson të marrë përgjegjësi për fjalën dhe veprimet e veta. Të rriturit pranë fëmijëve të kësaj moshe, sidomos prindërit, në vend, që të bezdisen e hutohen duhet të ndihmojnë fëmijën ta kalojë sa më shëndetshëm këtë periudhë të jetës. Shpesh veprimet e të rriturve, pranë fëmijës së frikësuar, demonstrojë padurim, bezdi dhe etiketime, që në fakt rëndojnë më shumë situatën. Prindërit, të afërmit, si gjyshërit, por edhe mësuesit duhet të qetësojnë fëmijën, duke i treguar se edhe ata si ai apo ajo, kështu janë ndjerë kur ishin në këtë moshë. Rritja nuk është gjë tjetër vetëm se një kombinim i frikës me ngazëllimin që arriti ta përballojë sfidën me të cilën e përballi rritja. Pa besimin dhe ndihmën tuaj, prindër e të rritur të tjerë, fëmija mbetet i dyzuar ndërmjet turpërimit si i dështuar e frikacak dhe frikës nga e panjohura. Lira Gjika /Fjala.al/Ke.Ba
