Banka e Shqipërisë njoftoi se në mbledhjen e fundit të datës 1 korrik ka miratuar vendimin “Për pezullimin e shpërndarjes së fitimit nga bankat”.
Në bazë të këtij vendimi pezullohet, deri në fund të vitit 2020, shpërndarja nga ana e bankave, të fitimit të mbartur nga periudhat e mëparshme, dhe të fitimit që do të realizohet për vitin 2020.
Kjo masë e autoritetit mbikëqyrës, synon të sigurojë mbështetje për bankat, kryesisht nëpërmjet rritjes së aftësisë së tyre për të përthithur humbjet e mundshme potenciale dhe për të mbështetur kredidhënien për klientët individë dhe biznese gjatë kësaj periudhe, thuhet në njoftimin e bankës.
Në fillim të muajit prill, Banka e Shqipërisë vendosi të pezullonte deri në fund të muajit qershor 2020, shpërndarjen nga ana e bankave, të fitimit të mbartur nga periudhat e mëparshme, të fitimit të realizuar në vitin 2019 si dhe të fitimit që do të realizohet përgjatë gjashtëmujorit të parë të vitit 2020. Sipas njoftimit të atëhershëm, kjo masë e autoritetit mbikëqyrës, synon të sigurojë mbështetje për bankat, kryesisht nëpërmjet rritjes së aftësisë së tyre për të përthithur humbjet e mundshme potenciale dhe për të mbështetur kredidhënien për klientët individë dhe biznese gjatë kësaj periudhe.
Sipas statistikave të bankës së Shqipërisë, të raportuar sipas standardeve lokale, për vitin 2019, fitimi i sistemit bankar ishte gati 20 miliardë lekë, me një rritje prej 8.1% me bazë vjetore.
Ndërsa në tremujorin e parë të këtij viti, fitimi i sistemit ishte 1.4 miliardë lekë, me një tkurrje prej 72% në raport me të njëjtën periudhë të një viti më parë dhe duke shënuar nivelin më të ulët të fitimeve që prej vitit 2013 për të njëjtën periudhë kohore, shkruan Monitor.
Rënia e fitimeve në tremujorin e parë 2020 erdhi si rrjedhojë e shtimit të ndjeshëm të shpenzimeve për provigjionime (fondeve që bankat lënë mënjanë për të mbuluar kreditë me probleme).
Bo.Ba/fjala.al
