Mbyllja e sezonit në Bundesligën gjermane, teksa kampionatet e tjera madhorë të vendeve të Evropës vazhdojnë akoma marshimin drejt fundit të këtij sezoni që po duket pa fund, teksa ka nisur në mes të gushtit të vitit të shkuar e pritet të mbyllet në fund të korrikut të këtij viti, ka bërë që të intensifikohen edhe zërat e merkatos. Një nga emrat më të përfolur ka qenë Milot Rashica.
Futbollisti i përfaqësueses së Kosovës, do të largohet nga Verder Bremeni gjatë kësaj vere, teksa një gjë të tillë e kanë konfirmuar edhe zyrtarët e klubit gjerman. 23-vjeçari ka shkëlqyer gjatë edicionit aktual, 2019-2020 me fanellën e klubit gjerman, teksa ka realizuar 11 gola në 34 ndeshje, duke dhënë edhe shumë pasime për gol. Dhe kjo ka bërë që lista e klubeve që e dëshirojnë Rashicën të shtohet.
E përditshmja italiane “Tuttosport” raporton se Milani ka kontaktuar me menaxherin e Rashicës, Altin Lalën, për ta bindur sulmuesin që të transferohet në “San Siro”. Por, natyrisht, konkurrenca për të siguruar shërbimet e mesfushorit të krahut me tipare sulmuese, është mjaft e ashpër, teksa Borusia e Dortmundit dhe Lajpcigu në Gjermani, Liverpuli në Angli dhe Napoli në Itali, kanë shfaqur interes për të.
Por e përditshmja sportive italiane raporton se interesimi i Milanit është serioz dhe drejtuesit e klubit kuqezi të veriut të Italisë kanë kontaktuar me Lalën, i cili, sidoqoftë, ka spikatur me këmbënguljen e tij për t’i mbajtur “pranë gjoksit kartat e tij”, duke mos pranuar të japë të dhëna për destinacionin e ardhshëm të 23-vjeçarit. Nuk dihet ende se në ç’fazë janë bisedimet midis palëve.
Milot Rashica, i lindur më 1996-ën, ka luajtur 72 ndeshjen me fanellën e Verder Bremenit, duke shënuar gjithsej 24 gola e duke dhënë edhe pasimin për 11 të tjerë. Ai ka luajtur gjithashtu edhe 27 gola me fanellën e përfaqësueses së Kosovës dhe ka shënuar edhe 10 gola. Kujtojmë se, më herët, mesfushori ka luajtur për Kombëtaren kuqezi, përpara se të kalonte nga Kosova.
