Futbollisti 28-vjeçar dëshiron të zhvendoset në kampionatin turk, tek Fenerbahçe. Duket se Xherdan Shaqiri është i vendosur për t’u larguar nga skuadra e Liverpulit gjatë kësaj vere.
Madje, mësohet se shtatshkurtëri ka kërkuar shkëputjen e kontratës me klubin anglez, për t’iu bashkuar Fenerbahçes, ekip me të cilin ka arritur marrëveshje në parim.
Kështu, ka raportuar të enjten në mbrëmje faqja e njohur sportive turk “Fotomaç”. Arsyeja që Shaqiri po kërkon shkëputjen e kontratës me Liverpulin është kërkesa e lartë e ekipit anglez për ta lënë të lirë që të transferohet te Fenerbahçe.
Për ta lënë të lirë futbollistin e përfaqësueses zvicerane, me origjinë nga Kosova, gjigantja angleze pretendon të marrë të paktën një ofertë mbi 20 milionë Euro.
28-vjeçari është nën kontratë me Liverpulin deri në fund 2023-shit dhe, në rast se shkëput kontratën, atëherë ai do t’i bashkohej Fenerbahçes si futbollist i lirë. Nga ana tjetër, klubi turk ka kohë që ka shprehur interesim për Shaqirin, të cilin e sheh si përforcim të madh për edicionin e ardhshëm.
“Xherdan Shaqiri pritet t’i bashkohet Fenerbahçes këtë verë, duke i dhënë fund qëndrimit dyvjeçar te Liverpuli”, – shkruan faqja sportive turke.
“Ai tashmë ka arritur marrëveshje personale me Fenerbahçen, por kërkesa e Liverpulit për ta lënë të lirë po e pengon Shaqirin ta realizojë transferimin. Si rezultat i kësaj, Fenerbahçe ka kërkuar nga Shaqiri të këmbëngulë në shkëputjen e kontratës me klubin anglez për t’u transferuar si futbollist i lirë”, – ka përfunduar faqja në fjalë./Bl.Ba/Fjala.al
