Marrëveshjen e firmosur sot mes PS-së dhe opozitës parlamentare, deputetja Rudina Hajdari e quajti një hap përpara për demokracinë.
Ajo deklaroi se është “premtim-mbajtëse” dhe se në zgjedhjet e ardhshme qytetarët do votojnë ata deputetë që do dalin me ide dhe emrat e tyre.
Hajdari i bëri sërish thirrje opozitës jashtëparlamentare që t’i bashkohen këtij treni të së ardhmes dhe mos ta lënë popullin opozitar që i lë në trenin dhe stacionin e së shkuarës.
“Jam shumë e kënaqur që ne sot arritëm t’i japim këtë premtim shqiptarëve, të cilët në zgjedhjet e ardhshme do të votojnë ata deputetë të cilët do i zgjedhë populli shqiptar dhe jo vetëm kryetari. Do votojnë ata deputetë që do dalin me ide dhe emrat e tyre përballë qytetarëve. Ky është një hap përpara për demokracinë shqiptare dhe ne po e hedhim këtë hap dhe këtë ndryshim sot në këtë ditë. Po ashtu po iu them se ajo që është dukur para shqiptarëve si një gjë e pamundur, një premtim që unë e mbajta deri në fund sot unë jam bashkë me kolegët e mi për të qenë këtu para jush dhe për t’iu thënë që unë i mbaj premtimet dhe jam “premtim-mbajtëse” dhe këtë e bëj me një përgjegjësi shumë të lartë. Po ashtu dua t’iu them që nëse sot ne jemi këtu jemi falë mbështetjes qytetare, shoqërisë civile dhe shumë grupimeve të tjera që e bënë këtë ditë historike, një moment të rëndësishëm për demokracinë në Shqipëri.
Dua edhe një herë t’i bëj thirrje opozitës jashtëparlamentare që t’i bashkohen këti treni të së ardhmes dhe mos ta lënë popullin opozitar që i lë në trenin dhe stacionin e së shkuarës” tha deputetja.
