Nga Blerina Balliu
Shkenca është e qartë: Maskat shpëtojnë jetë. Mbajtja e maskave u shpall e detyrueshme në shumë zona të Kinës që nga fillimi i virusit Corona. Shumë vende ndoqën shembullin e Kinës.
Por tashmë që kanë kaluar pothuajse 5 muaj nga fillimi i Covid-19 dhe shumë vende menduan se kaloi, shifra të larta infektimesh dhe vdekjesh po regjistrohen anembanë botës.
Këtu flasim edhe për Shqipërinë e cila tashmë prej më shumë se një muaj regjistron pothuajse çdo ditë mbi 100 raste të reja infektimesh dhe pothuajse nuk kalon më asnjë ditë pa regjistruar persona të cilët humbasin betejën me këtë virus.
Duke parë që situata është përkeqësuar sërish, Ministria e Shëndetësisë vendosi si rregull që mbajtja e maskave të bëhet e detyrueshme veçanërisht në ambiente e mbyllura, por a po zbatohen ky rregull?
Edhe nëse po, e gjitha kjo është për të mbrojtur veten tonë dhe të tjerët nga infektimi, prandaj o njerëz mos mendoni më se maska ju shëmton, apo nuk ju rri mirë, ajo nuk mund të shihet më si një veshje nëse të shkon apo jo, ajo është një aksesor që mbron jetën tuaj, të prindërve dhe të afërmve tuaj.
Nëse ende nuk e besoni se ky virus është i vërtetë mjafton të takoni të afërm të atyre që kanë të dashurit e tyre te Infektivi për të kuptuar rëndësinë e rrezikut që na kanoset dhe që mund ta parandalojmë me kaq pak kosto, vetëm një maskë.
Pse duhet të shohim çuditshëm kur një njeri ecën rrugës me maskë dhe nuk habitemi aspak kur shohim grumbuj njerëzish në plazhe, lokale, apo lulishte pa maska.
Kjo e fundit duhet të na indinjojë sepse nëse atyre nuk u dhimbset jeta, mua, ty dhe të dashurve tanë na kushton.
Prandaj një ndërgjegjësim duke filluar nga vetja nuk i kushton askujt, mbani maskat ju lutem, mos sakrifikoni veten dhe të tjerët.
Logjika e detyrimit për të mbajtur maskë është se nëse të gjithë i përmbahen atij, ulet rreziku i përgjithshëm i infeksionit në shoqëri.
Ndërkohë kujtojmë se në vendin tonë ka shkuar në 161 numri i viktimave për shkak të koronavirusit, ku vetëm në 24 orët e fundit 4 persona kanë humbur jetën./Bl.Ba/Fjala.al
