Ndërkohë që trafiku rëndohet, Policia Rrugore ka zbarkuar në terren dhe vijon punën për të ndihmuar lëvizjen e mjeteve duke shmangur bllokimet e ndalesat që vijnë si pasojë e parakalimeve të gabuara.
Ndërkohë uniformat blu bëjnë me dije se gjatë pasdites së sotme janë arrestuar dy drejtues mjetesh. Më konkretisht:
- Në Fier është vënë në pranga një drejtues mjeti, shtetasi D. Xh., 38 vjeç, pasi drejtonte mjetin në gjendje të dehur, në masën 0.61 mg/l dhe kryente manovra të rrezikshme në rrugë.
- Në aksin rrugor Librazh-Elbasan, është vënë në pranga 29-vjeçarin E. S., i cili drejtonte mjetin në gjendje të dehur, në masën 0.95 mg/l, duke u kthyer në rrezik potencial për sigurinë e jetës në rrugë.
Gjithashtu mësohet se në Vlorë, Durrës, Lezhë e Tiranë, gjatë pasdites së sotme, si rezultat i kontrolleve me radar janë pezulluar 13 leje drejtimi për shpejtësi dhe parakalime të gabuara me fushëpamje të kufizuar, si dhe 9 leje drejtimi, për drejtim mjeti nën ndikimin e alkoolit.
Njëkohësisht janë vendosur 49 masa administrative për parakalime të gabuara në akset e sipërpërmendura, pasi kanë krijuar bllokime në rrugë.
Po gjatë pasdites e deri në këto momente janë vendosur 76 masa për përdorim të celularit, 101 masa për mospërdorim të rripit të sigurimit dhe 23 masa për mosvendosje të kaskës mbrojtëse.
/En.Br./Fjala.al
