Nga Berat Buzhala
Qysh është e mundur?
– Nuk e din asnjë gjuhë të huaj, që të mos themi as gjuhën amtare, ama e din me përqindje absolute planin sekret të masonëve, të Bill Gates’it, që e kanë shpikë këtë virus, në mënyrë që me na vaksinu, që pastaj përmes çipave me i kontrollu mendjet dhe mendimet tona?
– E shkruan llome në vend të dhome, didhi në vend të dielli, …. në vend të pylli, ama e ka kristal të qartë krejt skemën e fuqive botërore, pse bëhen luftërat, kush kujt i shet armë, kush kënd e ka aleat, kush kënd do ta pushtojë, dhe fare në fund, kush do të ngadhënjejë e kush do të humbë?
– Nuk din me e çelë një email, ama e din saktësisht qysh funksionon sekreti i armëve bërthamore dhe mënyra e aktivizimit dhe kontrollimit të tyre?
– Nuk e din tabelën e shumëzimit, ama e din çka ka ndodhë deri në detaje me udhëtimin e njeriut të parë në Hanë. Përgjigje e tij përfundimtare është: Nuk ka shku njeriu i parë në Hanë, krejt ka qenë manipulim teknologjik. Niset prej vetes, deri vonë nuk ka shku as deri te dajt e vetë.
– Nuk e din çka po flasin baba me nanën në dhomën tjetër, ama e din çka kanë folë dhe çka janë marrë vesh Trumpi, Putini e Merkelka, mijëra kilometra larg.
Ku po i mësoni more këto sene? Ju me lexu nuk dini, e as me kuptu jo? Nuk i dini gjanat ma bazike para hundëve të juaja, ama jeni të armatosun deri në dhëmbë për çdo gjë tjetër që ndodh në planet dhe përtej tij?
George Orwell ka thanë: Injoranca është fuqi. Fatkeqësisht injoranca është shumica.
