Shifrat alarmante të infektimeve të reja me COVID-19, të shoqëruara me rritje të fataliteve, e kanë vënë vendin në alarm. 6 pacientë humbin jetën “në luftën” me koronavirusin. Në dy spitalet Covid ezaurohen kapacitetet spitalore, gati hapja e spitalit Covid-3, ku pritet të rekrutohet stafi mjekësor që shkoi në Itali për 1 muaj.
Nga Ina Allkanjari
Masat e marra deri më tani për parandalimin e përhapjes së COVID-19 në vend, ende nuk po japin rezultatet e dëshiruara. Kurba e të infektuarve me virus vijon të pësojë rritje nga dita në ditë, duke u shoqëruar me një numër të lartë vdekjesh. 6 humbje jete prej koronavirusit rezulton të jetë shifra e regjistruar gjatë 24 orëve të fundit nga Ministria e Shëndetësisë. Fatkeqësisht, virusi nuk ka të ndalur, krahas rasteve të fataliteteve vijon të rritet edhe numri i personave të infektuar, të cilët kanë nevojë për hospitalizim.
Në dy spitalet Covid në vend, Spitalin Infektiv dhe “Shefqet Ndroqi”, regjistrohen rreth 280 të shtruar, ndonëse vetëm 110 prej tyre janë të konfirmuar pozitivë me koronavirus. Shqetësuese mbetet edhe rritja e numrit të pacientëve të cilët ndodhen në terapi intensive, si dhe në intubim. Konkretisht në dy spitalet Covid 21 pacientë ndodhen në terapi intensive, ndërsa 6 të tjerë janë të intubuar. Mungesa e kapaciteteve spitalore i ka vënë në lëvizje strukturat përkatëse, për të mundësuar hapjen e spitalit Covid 3.
Mësohet se do të jetë ish-Urgjenca Kirurgjikale në QSUT, që po përgatitet për t’u kthyer në spital ku do të trajtohen të infektuarit me koronavirus. Nga ana tjetër, një vëmendje e veçantë po u kushtohet rekrutimeve për burime njerëzore, ku mësohet se në spitalin Covid 3 do të rekrutohet edhe stafi mjekësor që shkoi në Itali për 1 muaj, kjo edhe prej eksperiencës së fituar prej tyre, në luftën kundër COVID-19, në vendin fqinj.
Situata epidemiologjike
Gjatë 24 orëve të fundit në vendin tonë janë kryer 561 testime për të dyshuar të prekur nga COVID-19, ku 139 persona janë konfirmuar të prekur nga virusi. Shpërndarja gjeografike e rasteve pozitive ditore është si vijon: 81 raste në Tiranë, 10 në Berat, 8 në Durrës, 7 në Tropojë, 6 në Elbasan, nga 3 raste në Shkodër, Kukës, Lezhë, Kavajë, Pogradec, nga 2 raste në Korçë, Divjakë, Shijak, nga 1 rast në Lushnjë, Mirditë, Tepelenë, Vau i Dejës, Malësi e Madhe, Bulqizë.
Me gjithë rastet ditore të identifikuara pozitive, gjatë 24 orëve të fundit janë shëruar 69 qytetarë, duke e çuar numrin e të shëruarve në 3123, që nga fillimi i epidemisë. Ndërsa rastet aktive të prekura nga koronavirusi po ndiqen në dinamikë nga mjekët e familjes, sipas protokolleve të përcaktuara. Aktualisht, në Spitalin Infektiv dhe atë “Shefqet Ndroqi” po trajtohen 110 pacientë të konfirmuar pozitivë, ku 21 pacientë janë në terapi intensive, 6 prej të cilëve të intubuar. Po ashtu, në dy spitalet, Covid 1 dhe Covid 2, përveç pacientëve të konfirmuar pozitivë me COVID-19 vijojnë të marrin trajtim pacientë të dyshuar nga ana imazherike si të prekur nga COVID-19, të cilët po trajtohen sipas protokolleve nga ekipet tona mjekësore në të dy spitalet.
Humbjet e jetës
Edhe pas përpjekjeve të mëdha të ekipeve mjekësore, fatkeqësisht nuk e kanë fituar dot betejën me sëmundjen në dy spitalet Covid, një 58-vjeçar nga Durrësi, një 70-vjeçar nga Kruja, dhe një 82-vjeçare nga Shijaku. Nuk e kanë fituar betejën edhe një 63-vjeçar nga Kukësi, një 64-vjeçar nga Shkodra, si dhe një 69-vjeçar nga Elbasani.
Apeli i Ministrisë së Shëndetësisë
Rritja e rasteve me koronavirus në vend ka risjellë apelimin e Ministrisë së Shëndetësisë ndaj qytetarëve. Eugena Tomini, shefe e epidemiologjisë në Institutin e Shëndetit Publik, u bën thirrje qytetarëve të shmangin grumbullimet masive në lokale, bare, dhe çdo lloj ceremonie që shkakton rrezik për shëndetin dhe bëhet burim i shpërndarjes së infeksionit, duke rrezikuar shëndetin e gjithësecilit.
“Sistemi shëndetësor është në gatishmëri të plotë; epidemiologët në terren po vijojnë punën për testimin dhe gjurmimin e personave të dyshuar me COVID-19, me qëllim ndërprerjen e zinxhirit të infeksionit. Mjekët e familjes në të gjithë vendin monitorojnë në vijimësi personat e prekur nga COVID-19, që janë të izoluar në shtëpi dhe rastet e dyshuara. Në të dy spitalet që po trajtohen pacientët e prekur apo të dyshuar me infeksionin Sars-Cov 2, po punohet pa reshtur në shërbim të çdo pacienti, më përkushtim e profesionalizëm”, shprehet Eugena Tomini.
Sipas shefes se epidemiologjisë në ISHP, në këtë stad ku ndodhet vendi, është i nevojshëm bashkëpunimi dhe respektimi i masave të vendosura. Gjithashtu ajo bën thirrje për përdorim të maskës detyrimisht në të gjitha ambientet e mbylla, ruajtjen e higjienës personale dhe distancimin fizik, për mbrojtjen nga infeksioni dhe për kufizimin e përhapjes së tij.
COVID-19 – Statistika (5 gusht 2020)
Testime totale 43764
Raste pozitive 5889
Raste të shëruara 3123
Raste aktive 2589
Humbje jete 182
Shpërndarja gjeografike e rasteve aktive sipas qarqeve:
Tiranë 1451
Durrës 302
Shkodër 230
Fier 103
Vlorë 94
Lezhë 86
Korçë 82
Kukës 80
Elbasan 55
Berat 43
Dibër 32
Gjirokastër 26
