Detaje të njëpasnjëshme po dalin nga krimi horror i ndodhur pasditen e djeshme në Pogradec, ku djali i preku kokën nënës së tij.
Burime nga të afërmit e familjes për Fjala.al bëjnë me dije se sherri në familje ka nisur për telefonin e vajzës së autorit të krimit.
Të afërmit janë shprehur se autori 44-vjeçar, Olsi Çekiçi, ka dashur të vrasë të bijën 15 vjeçe, për shkak të telefonit, por ka ndërhyrë e ëma e tij për të mbrojtur mbesën.
Pikërisht këtu ka nisur gjithçka dhe ka përfunduar me vrasjen tragjike të të moshuarës, ndërsa 15-vjeçarja, që ka parë gjithë ngjarjen, ka njoftuar policinë dhe është larguar nga banesa me biçikletë.
Djali në inat e sipër masakroi me thikë për vdekje nënën e tij, Firdes Çekiçi, 70 vjeçe. Mësohet se ngjarja ka qenë makabre, pasi ai i ka prerë kokën nënës së tij dhe më pas e ka varur atë në derën e shtëpisë.
Sapo policia ka mbërritur në derën e shtëpisë së 44-vjeçarit, efektivët kanë parë kokën e së moshuarës të shkëputur nga trupi. Sipas bashkëfshatarëve, Olsi Çekiçi njihet si problematik dhe i dhunshëm, ndërsa nuk ishte hera e parë që kishte debate dhe dhunë në familjen e tij.
Po ashtu, burime nga Spitali i Pogradecit bënë të ditur se 44-vjeçari ishte një person i kartelizuar me probleme mendore, por që asnjëherë nuk ka pranuar të merrte mjekim, si dhe ishte përdorues i lëndëve të forta narkotike. Sipas burimeve nga uniformat blu, Çekiçi më herët ka qenë i shoqëruar në Polici për disa ngjarje të ndryshme.
Në ngjarjen e djeshme ka mbetur i plagosur edhe i vëllai i 44-vjeçarit, i cili ka ndërhyrë për të shuar konfliktin.
Ndërkohë, autori është arrestuar në momentin e parë që Policia ka mbërritur, pasi nuk ka pasur mundësi të largohej nga vendi i ngjarjes. Grupi hetimor ka shkuar në vendin e ngjarjes dhe ka nisur veprimet hetimore për të bërë të mundur dokumentimin e plotë të këtij krimi makabër./Bl.Ba/Fjala.al
