Sandro Tonali, Marash Kumbulla dhe Emerson Palmeiri janë tre futbollistë me të cilët drejtuesit e Interit kanë arritur marrëveshjen për t’i veshur zikaltër sezonin e ardhshëm, por klubi milanez po mban pezull gjithçka pasi ende nuk e ka të qartë nëse do të vijojë me Conten.
Fjalët e teknikut në përfundim të ndeshjes së fundit të kampionatit, nuk kanë tingëlluar aspak mirë edhe në Pekin, te pronarët e klubit zikaltër, ndërsa presidenti Steven Zhang ka mbërritur është rikthyer në Europë dhe pritet të mbajë një takim sqarues.
Pas rreth 24 orësh në Milano, 28-vjeçari kinez ka udhëtuar drejt Gjermanisë, ku do të ndjekë nga afër gjysmëfinalen mes Interit dhe Shakhtar Donetskut dhe do të përpiqet të motivojë skuadrën për të provuar të fitojë Europa Leaguen.
Menjëherë pas fundit të kompeticionit pritet të ketë një takim sqarues me Antonio Conten, ku shoqëria zikaltër do t’i bëjë të qarta vërejtjet që ka në drejtim të trajnerit dhe do të kërkojë që ky i fundit të tregohet shumë më i matur me deklaratat publike.
Por në se Conte nuk reflekton dhe nuk pranon se ka gabuar me sulmin ndaj drejtuesve e klubit, atëherë divorci është i pashmangshëm dhe te Interi kanë gati edhe planin B, që quhet Massimiliano Allegri.
Pikërisht për këtë fakt, tre lojtarët e përmendur në fillim po mbahen pezull, pasi që të tre kanë miratimin e Contes, por nuk janë prioritet për Allegrin, që nëse vjen te zikaltrit, do të këmbëngulë fort te sllovaku Milan Skriniar dhe do të kërkojë emra me peshë në mesfushë.
Në rastin më të mirë, aventura e Interit në Europë do të përfundojë më 21 gusht, datë kur edhe është planifikuar finalja e madhe e Europa Leagues, ndërsa vetëm më pas do të mendohet për planifikimin e sezonit të ri, pasi të jetë zgjidhur çështja e trajnerit./Ar.Ha/Fjala.al
