Presidenti Ilir Meta i ka bërë thirrje qeverisë, që të sigurojë tamponë falas për emigrantët. Sipas kreut të Shtetit, është e pamundur që një familje të paguajë 120-140 euro për tamponë. Më tej Meta tha se qeveria nuk duhet të lejojë që situata të tilla të përsëriten sërish.
“Dua të falenderoj median për rolin e veçantë që luajti për sensibilimizmin. Falenderoj gazetarët që kontribuan për shëndetin e familjarëve. Të cilët kontribuan edhe për shpëtimin e një fëmijë 11 vjeç. Jemi një vend rekord për emigrantë. Të gjithë strukturat duhet të ndjekin me përparësi lëvizjen e shtetasve. Qeveria duhet të sigurojë tamponë falas për qytetarët.
Një tampon nga 120-140 euro është i papërballueshëm. Qeveria duhet të subvencionojë tamponat dhe të marrë masa që situata në Kakavijë të mos përsëritet kurrë.”, tha Meta ndër të tjera.
Meta për krizën e krijuar në Kakavijë bën fajtor kryeministrin Edi Rama, i cili mban edhe postin e ministrit të Jashtëm. Teksa u pyet edhe për ndërhyrjen e Pandeli Majkos tek Kryepeshoki Janullatos, presidenti theksoi se qeveria shqiptare sposton debatin tek gjëra që nuk kanë kuptim.
“Nga dita e nesërme do t’i çoj një kalendar qeverisë për të parandaluar situata të tilla, si Pashkët, Viti Ri, pra kohët kur vijnë dhe ikin emigrantët. Çdo përpjekje për të fajësuar palën greke është pakuptim, qeveria greke edhe për të drejtat e një personi shqiptar me shtetësi greke e bën detyrën vet në mënyrë të jashtëzakonshme.
Kjo ishte detyrë e qeverisë shqiptare. Rama ka përgjegjësi për të, si kryeministër dhe si ministër i Jashtëm. Ka detyrime ndaj qytetarëve të saj. Ne e dimë shumë mirë se ku është frekuenca më e lartë e qytetarëve shqiptarë. Këto gjëra nuk u bënë dhe u krijua një situatë e jashtëzakonshme dhe spostojmë debatin në gjërat që nuk kanë kuptim. Ne fajësojmë edhe viktimat e kësaj situate. Për kushtetutën do flasim në shtator”, u shpreh Meta./Bl.Ba/Fjala.al
