Po flasim për Enver Hoxhën, për atë që instaloi në Shqipëri për 45 vite me radhë diktaturën, nga i cili vuajtën 100 mijë shqiptarë, ku u përndoqën, pushkatuan, persekutuan, burgosën e përdhunuan.
Por pavarësisht kësaj në pazarin e Gjirokastrës shumë turistëve të huaj që kanë zgjedhur këtë qytet për të vizituar u serviren librat që flasin për Enver Hoxhën.
Kjo është bërë e ditur përmes një video të postuar në rrjetin e tij social Facebook, nga avokati i njohur shqiptar Kujtim Cakrani.
“Në pazarin e Gjirokastrës helmojnë turistët e huaj me librat e shokut Enver dhe aktivitetin e tij terroristë! “Popull me sindromën e Stocholmit””, shkruan avokati Cakrani.
Sipas të dhënave zyrtare nga institucionet e Shqipërisë, gjatë regjimit komunist 59.009 shqiptarë u internuan në kampe përqendrimi, 7.022 humbën jetën gjatë internimit, 34.135 shqiptarë u burgosën si të dënuar për arsye politike, 984 shqiptarë kanë vdekur në burgjet e regjimit, 6.027 shqiptarë janë vrarë gjatë regjimit komunist në Shqipëri, ndërsa rreth 6.000 rezultojnë si të zhdukur.
Ndërkohë, u dëbuan nga qytetet kryesore dhe zonat kufitare me dhjetëra e mijëra banorë, të cilët konsideroheshin si kundërshtarë apo të rrezikshëm për regjimin, ndërsa u ekzekutuan edhe ata persona që tentonin të kalonin ilegalisht kufirin për t’u arratisur nga vendi./Bl.Ba/Fjala.al
