Shërbimi për Çështjet e Brendshme dhe Ankesat (ShÇBA) në bashkëpunim me policinë e Korçës ka arrestuar një punonjës policie, pasi akuzohet për dhënie ndihme për kalim të paligjshëm të kufirit.
Pas hekurave ka përfunduar shtetasi G.H., 24-vjeç, me detyrë punonjës policie SPZ në Komisariatin e Policisë Nr. 4 Tiranë.
“Ky shtetas duke udhëtuar me automjetin e tij, është ndaluar nga shërbimet e Komisariatit të Policisë Pogradec në dalje të qytetit, rreth orës 23:40 të mbrëmjes së djeshme. Nga kontrolli ka rezultuar se me automjetin e tij po transportonte dy migrantë sirianë, të cilët i ka marrë në dalje të qytetit të Bilishtit për t’i dërguar drejt Tiranës kundrejt shpërblimit prej 70 eurosh.” thuhet në njoftimin e policisë.
Në cilësinë e provës materiale janë sekuestruar automjeti, karta ID, patenta, pistoleta TT, 450 euro, 10 mijë lekë, 3 telefona celularë./En.Br./Fjala.al
