Shijakasit e rrjetës, përballë Mlladostit të Zagrebit dhe hungarezëve të Fino Kaposhvarit. Volejbolli kontinental përvijon rikthimin në parket dhe të premten, në Luksemburg, është hedhur shorti i Kupave të Evropës, si për femra, ashtu edhe për meshkuj. Siç dihet, në këto veprimtari kontinentale, Shqipëria do të përfaqësohet vetëm nga një ekip, ai i Erzenit, që do të marrë pjesë në turin e parë eliminator të Ligës së Kampioneve në volejboll për meshkuj.
Dhe shorti i hedhur të premten, e ka vendosur skuadrën shijakase, përballë një sfide të vështirë në trajtën e Mlladostit të Zagrebit dhe Fino Kaposhvarit të Hungarisë. Siç dihet, Erzeni e mbylli në krye të renditjes sezonin 2019-2020 të Kampionatit Kombëtar të Volejbollit për Meshkuj, një sezon që u ndërpre në mesin e marsit, për shkak të epidemisë së virusit korona.
Në fundin e qershorit, Federata Shqiptare e Volejbollit e ndërpreu zyrtarisht sezonin, duke mos shpallur “kampionë”, ndërsa vetëm Erzeni iu përgjigj thirrjes për të marrë pjesë në veprimtaritë kontinentale. Dhe tanimë, skuadra shijakase ka njohur kundërshtaret e grupit A, aty ku do të secila skuadër do të presë dy skuadrat e tjera në shtëpi për një miniturne.
Datat e këtij miniturneu, ku skuadrat do të ndeshen në fund 3 herë me njëra-tjetrën dhe do të luajnë gjithsej 6 ndeshje, janë nga data 22, deri më 24 shtator, nga data 29 shtator, deri më 1 tetor, dhe nga data 6 tetor, deri më 8 tetor 2020. Hungarezët e Fino Kaposhvarit ishin në Shqipëri në 2014-ën, ku e mundën dy herë Studentin, ndërsa kroatët e Mlladostit të Zagrebit rikthehen përballë ekipeve shqiptare për herë të parë që nga viti 1983.
La.Mi/Fjala.al
