Çështja e detit/‘Monika ia ka lënë Peço peshkatarit grepin këtë herë’, Rama ironizon Kryemadhin
Ditën e sotme kryeministri Rama bëri një reagim të gjatë në lidhje me çështjen e kufirit detar. Ndër të tjera në postimin e tij në Facebook kreu i qeverisë nuk ka lënë pa thumbuar as kryetaren e LSI, Monika Kryemadhi.
Rama është shprehur se janë pikërisht ata që e sulmojnë tani ata të cilët bënë atë marrëveshje antikombëtare dhe e futën detin në çorbën e Shqipërisë që qeverisen.
Rama ka shkruar gjithashtu se Kryemadhi kësaj herë nuk ka ndërhyrë për çështjen pasi se është e zënë me skuqje karkalecash e muzike desperado ndërkohë që këtë punë ia ka deleguar Peço peshkatarit duke nënkuptuar në këtë rast nënkryetarin e LSI, Petrit Vasilin.
“Sot po këta që e bënë atë marrëveshje antikombëtare dhe e futën edhe detin në çorbën e Shqipërisë që qeverisën, prej padijes së tyre të dhimbshme a prej shpërfilljes sportive të interesit kombëtar ose të dyjave bashkë, kanë kapur kallamat me dorë e kanë dalë për gjahun politik të radhës.
Për të mbrojtur detin nga unë! O Zot! Duhet të jesh peshk i trullosur komplet që ta hash karemin se Lulëzim Basha, Ilir Meta dhe Sali Berisha (shyqyr Monika ia ka lënë Peço peshkatarit grepin këtë herë, se është e zënë me skuqje karkalecash me muzikë Desperado:-), po mbrojnë sot nga unë detin që e bënë kos e dhallë, sa herë zunë dybekun me dorë.
Megjithatë, fatkeqësisht, u ka zënë grepi gjithnjë peshq të trullosur dhe s’kanë faj që vazhdojnë ta hedhin përditë në detin e muhabetit publik, karemin e politikës së tyre pa din e as iman”, shkruan ndër të tjera Rama.
