E ashtuquajtura “FBI-ja shqiptare”, nis sot zyrtarisht nga puna. Për të paktën 5 vitet e ardhshme Byroja Kombëtare e Hetimit, institucioni i cili pritet të fusë në rrjetë “peshqit e mëdhenj”, do të drejtohet nga një grua. Aida Hajnaj, me një karrierë 30-vjeçare në Policinë e Shtetit, fitoi garën për të drejtuar institucionin e ri të drejtësisë shqiptare.
51-vjeçarja, do të takohet me prokurorët e SPAK-ut për të mësuar rreth dosjeve që ky institucion do të hetojë. Gazeta “Fjala”, përmes burimeve të saj, mësoi se Hajnaj do paraqitet që në orët e para të mëngjesit në dyert e SPAK-ut, për të nisur nga puna. Sipas informacioneve, mësohet se drejtoresha e BKH-së fillimisht do të kryejë një takim me drejtuesin dhe prokurorët e SPAK-ut, ku do të flitet për dosjet e reja që janë regjistruar së fundmi në këtë institucion.
Tri ditë më parë gazeta “Fjala” mësoi ekskluzivisht se janë plot 180 kallëzime dhe procedime penale të regjistruara për korrupsion dhe krime të rënda, procedime për të cilat së shpejti SPAK-u dhe BKH-ja do të nisin hetimet për të vënë përpara drejtësisë të gjithë zyrtarët apo ish-zyrtarët e lartë të korruptuar, si dhe kapot e botës së krimit. Në ditët në vijim Hanaj pritet të niset drejt Shteteve të Bashkuara të Amerikës, ku do t’i nënshtrohet një trajnimi të gjatë nga federalët amerikanë. Gazeta “Fjala” mësoi se Hajnaj do të udhëtojë brenda këtij muaji drejt Virxhinias, për t’u trajnuar në akademinë e FBI-së. Përveç ndihmës që do t’i jepet për trajnimin e hetuesve të BKH-së, amerikanët do t’i sigurojnë institucionit më të ri të drejtësisë shqiptare edhe pajisje të sofistikuara për të hetuar “peshqit e mëdhenj”.
Gjithashtu, për dy vite një agjent federal amerikan do të jetë prezent në ambientet e Byrosë Kombëtare të Hetimit, për të monitoruar punën e hetuesve shqiptarë. Por, që ky institucion të marrë formë të plotë dhe të nisë nga puna, duhet që të plotësohet edhe me hetuesit e rinj që do të përzgjidhen për të kopsitur dosjet e korrupsionit dhe krimit të organizuar. Drejtoresha e BKH-së pritet të nisë menjëherë procedurat për rekrutimin e 60 hetuesve, që do kenë rolin kryesor në një dosje, pasi, me ndryshimet e reja ligjore, ata do të jenë personat përgjegjës për hetimin. Kandidatët që do të bëhen pjesë e institucionit ku janë fokusuar sytë e të gjithë shqiptarëve, do të vlerësohen në bazë të aftësive profesionale, integritetit, por edhe aftësive mendore dhe fizike.
Fillimisht, ata duhet të plotësojnë një formular “on line” dhe deklaratën e pasurisë dhe figurës e pasi të kalojnë këtë fazë do t’u duhet të kalojnë dy provime me shkrim, një intervistim me panelin e SPAK-ut dhe një testim fizik e shëndetësor. Byroja Kombëtare e Hetimit do të zëvendësojë Policinë Gjyqësore të Krimeve të Rënda. Ky organ do të shërbejë vetëm pranë SPAK-ut dhe do të ketë në fokus krimin e organizuar dhe korrupsionin. Do të ketë akses në përgjime, në sistemet elektronike dhe në çdo gjë tjetër që konsiderohet e vlefshme për hetimet. Po ashtu, ky organ do të monitorojë anëtarët e SPAK-ut, duke u përgjuar telefonat dhe duke u kontrolluar llogaritë bankare. /Ra.My.Fjala.al/
