Kuqezinjtë e Bushit kapërcejnë pësimin e një goli, shënojnë 3 herë në të dytën dhe ngadhënjen 3-1. Shpresat e Shqipërisë kanë vuajtur, por ia kanë dalë të shmangin një tjetër të papritur përballë përfaqësueses së Nën-21-vjeçarëve të Andorrës, duke kapërcyer mbylljen e pjesës së parë në disavantazh dhe duke përmbysur gjithçka me 3 gola në pjesën e dytë.
Në fakt, ndeshja e luajtur në Stadiumin “Elbasan Arena” dhe e sjellë për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH Sport, ka nisur mjaft keq për Shpresat, pasi Andorra fiton një 11-metërsh pas vetëm 52 sekondash lojë dhe kapiteni Alaez nuk gabon nga pika e bardhë.
Goli e ka goditur skuadrën e trajnerit Alban Bushi, por kuqezinjtë kanë sidoqoftë dy pretendime të qenësishme për 11-metërsh, menjëherë më pas, por edhe në minutën e 22-të me Xhixhën, por që nuk janë gjykuar të tilla nga kryesori luksemburgas, ndërsa midis tyre, në minutën e 13-të, Xhixha vë seriozisht në vështirësi gardianin e portës mike, që sidoqoftë largon rrezikun.
Shpresat do ta mbizotërojnë lojën në gjysmën e dytë të pjesës së parë, por herë për pasaktësi në goditje, siç është rasti i Tucit në minutën e 31-të, herë për mosndërthurje të kuqezinjve me njëri-tjetrin, siç ndodh 3 minuta më vonë, por edhe për meritë të portierit mik, Pires, siç ishte rasti i Kallakut në minutën e 38-të, nuk do të arrijnë ta gjejnë dot rrugën e rrjetës dhe 45 minutëshi i parë do të mbyllet me epërsinë e miqve.
Ai i dyti nis me trajnerin Bushi që largon nga fusha Xhixhën dhe Çelhakë dhe vendin e tyre e zënë Çokaj dhe Mihana dhe Shpresat janë më kërkuese dhe rastet nuk mungojnë, e sidomos spikat ai i Muçit, i cili, i vetëm përballë portierit, sheh goditjen e tij t’i devijohet jashtë për një goditje këndi. Megjithatë, atë që nuk e bëjnë dot sulmuesit, e bën qendërmbrojtësi Selmani, i cili do të thyejë qëndresën e miqve në minutën e 62-të dhe barazon shifrat.
Shpresat vazhdojnë të këmbëngulin dhe, më në fund, është i futuri në fushë në pjesën e dytë, Vrioni, ai që shënon golin e dytë të kuqezinjve dhe përmbys shifrat në minutën e 85-të. Në 5 minutat shtesë ka kohë edhe për një tjetër gol kuqezi, kur Bullari përfiton nga goditja e Kallakut, që rrok shtyllën dhe nuk e ka të vështirë të shënojë. Mbyllet kështu me rezultatin 3-1 kjo ndeshje e Kombëtares kuqezi të Nën-21-vjeçarëve ndaj homologëve të Andorrës dhe Shpresat konsolidojnë vendin e 3-të të renditjes së grupit.
Pa.Va/Fjala.al
