Antoine Griezmann është optimist për të ardhmen e tij në Barcelonë. Sulmuesi francez në një intervistë për RTL, rrëfeu gjendjen aktuale të Barcelonës si dhe foli për sezonin e tij të parë në Camp Nou.
Pas dështimit të hidhur në Ligën e Kampionëve ndaj Bayern, Griezmann përballet me sezonin e tij të dytë në Barcelona me disa paqartësi. Francezi kërkon të vendoset përfundimisht në Camp Nou ndërsa siguroi se marrëdhënia e tij me Leo Messi do të përmirësohet.
“Ka qenë një sezon shumë i komplikuar për të gjithë, por tani mund ta fillojmë përsëri”, tha Griezmann, i cili më pas u pyet për marrëdhënien e tij me Messin që sipas tij, nuk shkonte dhe aq mirë.
“Ka qenë e ngjashme me marrëdhënien time me Mbappe, në fillim nuk u kuptuam përmes pasimeve dhe më është dashur shumë kohë për të kuptuar veten me të. Gjërat me Messin do të jenë më mirë”, sqaroi ai.
Griezmann gjithashtu foli për sezonin e dytë që e pret tek Barcelona, në të cilin do të ketë një trajner të ri dhe ku shpreson të japë versionin e tij më të mirë.
“Unë jam shumë mirë te Barcelona, e di që kam besimin e klubit dhe të trajnerit. Unë dua të shoh përsëri shokët e mi të skuadrës dhe të jap gjithçka për të fituar të gjitha trofetë e mundshëm, pasi kemi pasur një sezon bosh që nuk kishte ndodhur tek Barcelona për një kohë të gjatë”, përfundoi francezi./Bl.Ba/Fjala.al
