Këngëtari i njohur Sabri Fejzullahu ka marrë nënshtetësinë shqiptare. Kjo ka ndodhur me miratimin e Presidentit të Republikës, Ilir Meta.
Fejzullahu u paraqit dje në Drejtorinë e Policisë së Tiranës, ndërkohë që pasi ka marrë në dorë pasaportën, ka dalë që andej si shtetas i Republikës së Shqipërisë duke e puthur dhe shtrënguar fort.
Tejet i emocionuar dhe i pushtuar nga lotët, ai pasi ka falenderuar punonjësit e policisë që e kanë shoqëruar në dalje prej drejtorisë së policisë së Tiranës, është dëgjuar të thotë:
“E falenderoj me shpirt Presidentin e Republikës së Shqipërisë zotin Ilir Meta, që më nderoi e më bëri të jetoj ditën më e lumtur të jetës time!”
Postimi i Sabri Fejzullahut
I dashur President Meta, Jam i nderuar me dékretin tuaj për shtetësinë Shqiptare. Më keni bërë krenar me këtë, keni nderuar punën dhe angazhimin tim nji jetë të tërë ne rriten dhe lartësimin e zerim dhe kulturës Shqiptare kudo nëpër botë.
I dashur President, unë sot me pasaportën Shqiptare nuk Jam më shumë shqiptar se që isha që nga dita kur linda. Një jetë të tërë vogëlsia ime ishte në shërbim të Shqipërisë, Kosovës, asaj Shqipërisë gjeografike të cilës ju i shërbyet me guxim dhe nder i dashur President.
Të faleminderit shumë! Ndjehem i vlerësuar dhe respektuar e kjo për mua do të thotë shumë./Bl.Ba/Fjala.al
