Sot regjistrohen plot 6 vite nga vdekja e gazetarit të njohur të Televizionit Shqiptar Kiço Fotiadhi. Në këtë ditë kanë qenë të shumtë miqtë dhe të afërmit që e kanë kujtuar atë, mes të cilëve edhe kolegu i tij Dhimitër Gjoka.
Përmes një postimi në rrjetin e tij social Facebook, Gjoka ka shpërndarë një foto ku shfaqen të dy krah njeri- tjetrit ndërsa e shoqëron me mesazh emocionues.
“Sot janë 6 vjet të ndarjes nga jeta të kolegut dhe spikerit të madhe të Radioteleviziv Kico Fotiadhi. I paharruar kujtimi i tij”, shkruan Dhimitër Gjoka.
Gazetari Kiço Fotiadhi u nda nga jeta në moshën 74-vjeçare. Ai ka dhënë emisionin e parë të lajmeve në historinë e sapo nisur të Televizionit Shqiptar, më 13 mars të vitit 1963.
Kiço Fotiadhi është dekoruar nga ish-Presidenti i Republikës, Bamir Topi me Urdhrin “Naim Frashëri” i Artë me motivacionin: “Protagonist i shquar i ekranit televiziv, promovues i eventeve me rëndësi kombëtare, gazetar i njohur novator”.
Për 30 vjet me radhë, zëri dhe portreti i tij ka shoqëruar çdo mbrëmje shqiptarët nga ekrani i vetëm shqiptar. Kiço Fotiadhi është figura e parë e historisë së Televizionit në vendin tonë. Asokohe ishte vetëm 23 vjeç dhe studionte për aktrim, por thirrja për t’iu përkushtuar televizionit e ndau përfundimisht nga rruga e artit.
Kiço Fotiadhi do të jepte lajmet në një studio, kur vetë nuk kishte parë ende me sytë e tij një aparat televizori. Në atë kohë në gjithë Tiranën nuk kishte më shumë se 20-30 familje që kishin televizorë.
E megjithatë, gjatë 30 viteve të karrierës së tij gazetareske, ai arriti të hynte në çdo familje shqiptare duke lënë si gjurmë të paharrueshme, zërin dhe portretin e tij./Bl.Ba/Fjala.al
