Nga Elvis Myrta
Pesë vjet hetime të autoriteteve italiane në bashkëpunim me Europolin çuan në goditjen e një rrjeti ndërkombëtar të trafikut të kokainës nga Amerika Latine në Evropë, i drejtuar nga një grup kriminal shqiptar. 30 masa arresti me burg u ekzekutuan nga policia italiane e Firences, 5 prej të cilëve u prangosën në Shqipëri në një operacion të koduar “Los Blancos”, siç është dhe emri ndryshe i skuadrës së Realit të Madridit. Paratë pastroheshin në Kinë. Detajet nga hetimet dhe si ranë në gjurmët e trafikantëve policitë e katër shteteve. Kush janë dy organizatorët kryesorë të kësaj organizate kriminale, Dritan Rexhepi dhe Eldi Dizdari.
Një megaoperacion i udhëhequr nga autoritetet italiane në bashkëpunim me disa vende të Bashkimit Evropian, çoi në shkatërrimin e një karteli të fuqishëm droge, që drejtohej nga shqiptarë. Nga hetimet 5-vjeçare të autoriteteve italiane u bë i mundur sekuestrimi i 4 tonelatave droge dhe miliona eurove që pjesëtarët e kësaj organizate kanë përfituar nga aktiviteti i tyre kriminal.
Sipas Europolit, i gjithë ky rrjet që dyshohet se ka në krye Dritan Rexhepin që kishte kontakte me kartelet e drogës, kontrollonte trafikun e kokainës nga Amerika Latine deri te shpërndarësit në Evropë. Për të kryer transportin e kokainës ata kishin ngritur një kompani të quajtur “Kompania Bello”, e cila merrej me importimin e ngarkesave të mëdha të kokainës të financuara nga grupe të rëndësishme të trafikantëve të drogës që veprojnë në të gjithë Evropën.
Hetimet për shkatërrimin e këtij grupi, që drejtohej nga Rexhepi, zgjatën 5 vjet. Europoli bën me dije se këtij grupi në periudha të ndryshme i janë sekuestruar rreth 5 milionë euro kesh, si dhe një sasi rekord droge, prej 4 tonësh kokainë, vlera e së cilës kap një shifër prej 100 milionë eurosh, nëse do të hidhej në treg. Operacioni i koduar “Los Blancos”, i kryer më 15 shtator, përfshiu bashkëpunimin e policisë së 10 shteteve dhe solli arrestimin e të paktën 20 personave, 11 prej të cilëve janë shqiptarë.
Në prangat e autoriteteve të huaja përfunduan Eldi Dizdari 30 vjeç, arrestimi i të cilit u bë i mundur në Dubai. Në Rumani u arrestua 40-vjeçari Lek Çolaj, në Spanjë Sokol Aliko, i njohur edhe si Sokol Mehmetaj, ndërsa në Hungari u vu në pranga Robert Varga. Ndërsa në vendin tonë operacioni u shtri në Tiranë, Durrës, Lezhë dhe Vlorë. Në kryeqytet, në prangat e policisë përfundoi Gentjan Manaj.
Në Vlorë u arrestuan Elvis Jaupaj dhe Jorin Llambro. Blutë e Durrësit vunë në pranga Rexhino Ibrahimin, ndërsa në Lezhë u arrestua Vladimir Lesaj. Gjithashtu, pjesë e këtij karteli është edhe Altin Velsula. Aktualisht, ky shtetas ndodhet në burg, në Norvegji, aty ku iu komunikua edhe masa e sigurisë. Personat e tjerë të arrestuar në saje të operacionit të koduar “Los Blancos”, u prangosën në Itali, Holandë, Gjermani dhe Greqi. Ky operacion konsiderohet si më i madhi i këtij lloji kundër krimit të organizuar shqipfolës dhe është rezultat i një ekipi të përbashkët hetimor me pjesëmarrjen e Italisë dhe Holandës, në të cilin palët kanë punuar ngushtë së bashku për pesë vjet.
Si funksiononte grupi kriminal
Për vite me radhë, importuesit ndërkombëtarë punonin veçmas grosistëve dhe bandave që shpërndanin drogën në rrugë. Në këtë rast, rrjeti shqipfolës kontrollonte gjithë zinxhirin, nga organizimi i dërgesave të mëdha nga Amerika Veriut, deri te shpërndarja në Evropë, duke përdorur mjete komunikimi të sofistikuara dhe të koduara.
Ishte vetë kreu i kësaj organizate, kriminale, i cili jeton në Ekuador, ai që negocionte drejtpërdrejt me kartelet e Amerikës së Jugut. Ai organizonte dërgesa të mëdha kokaine në portet kryesore të Evropës, dhe me ndihmën e bashkëpunëtorëve në Itali, Holandë dhe Shqipëri përgatisnin shpërndarjen në mbarë Evropën.
Kokaina trafikohej në vendet e Evropës nëpërmjet automjeteve të modifikuara. Banda bënte pastrim parash përmes një sistemi me origjinë nga Kina, i njohur si sistemi “fei ch’ien”. Një operator në krahun tjetër tërheq shumën e parave në një vend tjetër në botë, dhe ia kalon marrësit të shumës. Ky rrjet ka pastruar miliona euro, duke mos lënë asnjë gjurmë për hetuesit. Nga ana e saj, policia shqiptare bën me dije se në Shqipëri operacioni është zhvilluar nga Departamenti i Policisë Kriminale, në bashkëpunim me drejtoritë vendore të policisë Tiranë, Vlorë, Lezhë, Durrës e Shkodër, me mbështetjen e Forcës së Posaçme Operacionale në Policinë e Shtetit, të Njësisë së Kërkimit “Fast” dhe të Zyrës së Interforcës në Shqipëri.
Mësohet se koordinatori për shpërndarjen e drogës në këtë organizatë kriminale e kishte Eldi Dizdari, i njohur edhe si Denis Matoshi. Ai është një emër i njohur për policinë shqiptare, meqë dy vite më parë u hetua për ngjarjen e ndodhur në 4 tetor të vitit 2018, në zonën e ish-Bllokut, në kryeqytet, ku mbeti i vrarë Fabian Gaxha dhe u plagosën Ervis Martinaj dhe Eljo Hato.
Në atë kohë hetuesit dyshonin se ngjarja e rëndë ndodhi si pasojë e një konflikti që Dizdari kishte me Ervin Matën, për shkak të prishjes së pazareve të drogës. Ai kontrollonte të gjithë zinxhirin, nga rregullimi i dërgesave të mëdha direkt nga Amerika e Jugut, deri te shpërndarja në të gjithë Evropën.
Ja pse operacioni u kodua “Los Blancos”
Operacioni për goditjen e kësaj organizate kriminale u kodua “Los Blancos”, siç njihet ndryshe edhe skuadra e Realit të Madridit, për shkak të ngjyrës së bardhë të kokainës. Hetuesit e Antimafias italiane vendosën ta kodojnë kështu, për shkak se droga që transportohej në Evropë, ishte e një cilësie të lartë. Mbi çdo pako të mbështjellë me natriban, brenda kokaina ishte me mbishkrimin “Bello” duke nënkuptuar pastërtinë e lartë të saj dhe vlerën e madhe në treg. Ky grup, sipas hetuesve, përdorte komunikimet e koduara nëpërmjet chat-eve “Sky eç” dhe “Enchr” Rregulli i trafikut ishte 50 % e ngarkesës e shqiptarëve dhe 50 % e bosëve të Amerikës Latine, deri sa ajo mbërrinte në portet evropiane. Në tetor 2016 këtij grupi në portin Guayqual i është sekuestruar një sasi prej 600 kg kokainë, e gatshme për t’u nisur drejt Evropës. Po ashtu, këtij grupi i janë sekuestruar më 2016 dhe 240 mijë sterile, si dhe 1,4 milionë euro cash. Ndërsa Antimafia italiane ka arritur të sigurojë prova se cilido anëtar që do të bashkëpunonte me drejtësinë, në rast të një arresti, dhe nuk respektonte kodin omerta, i njohur si heshtja, do të ekzekutohej.
Kush janë dy organizatorët kryesorë të kësaj organizate kriminale
Dritan Rexhepi dhe Eldi Dizdari janë dy personat kyç të këtij karteli droge, të cilët kanë trafikuar tonelata drogë nga Amerika Latine drejt Bashkimit Evropian. Rexhepi ishte “koka” e kësaj organizate. Ai ishte personi që siguronte kokainën në Ekuador. Ndërsa Dizdari kishte rolin e koordinatorit të shpërndarjes së lëndës narkotike te personat e tjerë që e prisnin drogën në portet e vendeve të Bashkimit Evropian.
31-vjeçari, konsiderohet një person me rekorde kriminale të theksuara në fushën e trafikimit të drogave të forta dhe krimeve ndaj personit. Eldi Dizdari, i arrestuar dy ditë më parë në Dubai, është kushëri i afërt me Arbër Çekajn, pronarin e kompanisë së bananeve, të dënuar për trafikun e 613 kg kokainë që u sekuestrua në Durrës. Ai ishte vënë nën hetim 5 vite më parë nga autoritetet italiane, si pjesë e një karteli të fuqishëm që drejtohej nga shtetas shqiptarë, i specializuar në trafikimin e drogës në Evropë.
Ai ishte shpallur në kërkim edhe si i përfshirë në vrasjen e bujshme në zonën e ish-Bllokut, e ndodhur më 4 tetor 2018, ku vdiq Fabian Gaxha dhe mbetën të plagosur Ervis Martinaj dhe Eljon Hato. Bosi i drogës është bashkëshorti i ish-miss-it shqiptar, Suada Sherifi. Pasi u shpall në kërkim, e gjithë familja u shpërngul në Dubai. Ai u shpall në kërkim, pasi është personi që ka pasur një konflikt të fortë me Ervin Matën në mbrëmjen e 4 tetorit, para lokalit “Monopol”, rreth gjysmë ore para se të ndodhte përplasja me armë brenda këtij lokali.
Mata dhe Dizdari janë konfliktuar me njëri-tjetrin në rrugë, pikërisht përpara lokalit “Monopol”. Dyshimet e autoriteteve ligjzbatuese janë se Mata dhe Dizdari janë konfliktuar për çështjen e një borxhi financiar, borxh i cili nuk ishte shlyer nga Ervin Mata. Eldi Dizdari njihet dhe me emrin Denis Matoshi. Sakaq, është përfolur se ai ka qenë i përfshirë me Arbër Çekajn në trafikun e 613 kg kokainë që u sekuestrua në Durrës, por prokuroria për mungesë të provave nuk ngriti asnjëherë akuza ndaj tij. Për sa i përket Dritan Rexhepit, ai konsiderohet si një nga shqiptarët me të kërkuar në botë.
Dritan Rexhepi, është arratisur nga burgjet e tri shteteve, derisa u kap nga Interpoli në Amerikën e Jugut. I shumëkërkuari u arrestua në Katalunja të Ekuadorit, ku sot është duke vuajtur dënimin për një sërë veprash penale. Emri i tij ndodhej në listën e 10 personave më të kërkuar nga Interpoli. I cilësuar si “mjeshtri” i arratisjeve, nuk kërkohej vetëm në Shqipëri, por edhe në shumë shtete të tjera. 39-vjeçari është cilësuar si vrasësi i parë me pagesë në Shqipëri.
Në vendin tonë ai akuzohet për vrasjen e dy policëve në Fushë-Krujë, në vitin 1998. Ndonëse policia shqiptare e arrestoi studentin e Juridikut, ai arriti të arratisej po atë ditë nga Komisariati i Durrësit. Rexhepi ka mundur të arratiset edhe nga burgu i sigurisë së lartë i Pavias, në Itali, së bashku me dy shqiptarë të tjerë. Në korrik të 2011-s, ai u arrestua për grabitjen e njërës prej bankave më të mëdha në Barcelonë, por arriti të arratisej në mënyrë spektakolare. Gjithashtu, ka dyshime se Rexhepi mund të ketë lidhje edhe me porosinë e rrëmbimit dhe ekzekutimit të Arjan Prengës, në janar të këtij viti.
Lleshaj: Goditje e paprecedentë ndaj krimit të organizuar
Në lidhje me operacionin e djeshëm, të ndërmarrë nga Europoli, reagoi edhe ministri i Brendshëm, Sandër Lleshaj. Një një reagim në rrjetet sociale Lleshaj përgëzoi Policinë e Shtetit, si dhe policitë e vendeve të tjera që morën pjesë në operacionin ndërkombëtar të koduar “Los Blancos”, ku u godit organizata e trafikut të kokainës që drejtohej nga shqiptarë.
Sipas ministrit, ky operacion është një goditje e paprecedentë ndaj krimit të organizuar. “Finalizimi i suksesshëm sot i operacionit ‘Los Blancos’ në 10 vende nën koordinimin e Europolit, në të cilin mori pjesë aktive edhe Policia e Shtetit, është një tjetër sukses i rëndësishëm, që provon edhe një herë pjekurinë dhe besueshmërinë e lartë të saj në kuadër të angazhimeve ndërkombëtare.
Shkatërrimi i një grupi shumë të sofistikuar criminal, të përbërë kryesisht nga shqipfolës dhe kapja e një sasie të madhe kokaine dhe parash, është një goditje e paprecedentë ndaj krimit të organizuar”, shkroi Lleshaj. Gjithashtu, në reagimin e tij ai u shprehu mirënjohje të gjitha agjencive ligjzbatuese që u angazhuan në këtë megaopeacion. “Meritojnë mirënjohje të gjitha agjencitë e vendeve që u angazhuan në këtë operacion, si Italia, Holanda, Greqia, Hungaria, Rumania, Gjermania, Spanja, Mbretëria e Bashkuar, Dubai dhe, pa dyshim, edhe Policia e Shtetit Shqiptar.
Ky operacion dëshmon edhe një herë nevojën e madhe, por dhe dobinë e jashtëzakonshme që ka bashkëpunimi ndërkombëtar në luftën ndaj krimit të organizuar, i cili mund të luftohet me sukses real vetëm kur agjencitë e zbatimit të ligjit bashkëpunojnë ngushtë në nivel operacional”, e mbylli regimin e tij në twitter Lleshaj./Jo.Be/Fjala.al
