Nëse Donald Trump humb zgjedhjet në nëntor, mund të mos ketë një tranzicion paqësor të pushtetit, pasi presidenti refuzon të angazhohet për diçka të tille.
Shumë shtete po inkurajojnë votimin me postë, duke cituar nevojën për të mbrojtur amerikanët nga covid-19.
Kreu i Shtëpisë së Bardhë tha se beson se rezultati i zgjedhjeve mund të përfundojë në Gjykatën e Lartë, ndërsa sërish hedh dyshime mbi votimin me postë.
I pyetur nga gazetari nëse do të angazhohej për një tranzicion paqësor të pushtetit pas zgjedhjeve, Trump u përgjigj se “Do të duhet të shohim se çfarë do të ndodhë. Siç e dini jam ankuar shumë për fletëvotimet, janë një katastrofë”.
Edhe në 2016 Trump refuzoi të angazhohej për pranimin e rezultatit të zgjedhjeve në përballjen me kandidaten demokrate Hillary Clinton, diçka të cilën ajo e cilësoi si sulm ndaj demokracisë.
Senatori republikan Mitt Romney, kritik i presidentit Trump, në një reagim në rrjetin social Twitter citoi se tranzicioni paqësor i pushtetit është thelbësor për demokracinë dhe se pa të, shtetet e bashkuara do të ishin Bjellorusi. Ru.Do/ Fjala.al
