Ka përfunduar takimi i mjekëve me ekspertët e ministrisë së Shëndetësisë ku është diskutuar lidhur me 4 kërkesat e mjekëve, 3 prej të cilave varen drejtpërdrejtë nga qeveria.
Në përfundim të takimit mjeku i Spitalit Infektiv, Gent Stroni , është shprehur për mediat se ditën e hënë do të ngrihen grupet e punës për të shqyrtuar 4 kërkesat e bluzave të bardha.
Në takimin e sotëm të bluzave të bardha me përfaqësi të qeverisë fokusi është vendosur edhe tek rritja e rrogave të mjekëve dhe infermierëve me 40%.
“Kemi lënë juristin tonë dhe të ministrisë, që të arrijnë në detaje për draftin përfundimtar. U vendosën disa piketa dhe u la që dita e hënë të jenë nominale emrat e grupeve nga ana jonë për të vazhduar më tej procedurën. Sa i përket pagës ne nuk jemi te 40%, kemi argumentime të tjera, të cilat do duhet të ulemi në një grup pune. Ne jemi vendi me pagesën më të ulët në gjithë rajonin. Ky është një argument, që do duhet parë. Do duhet parë pse 40% dhe jo 41%? Kemi argumentet tona, që do t’i sjellim në grupet e punës. Çdo gjë do duhet të jetë në bazë të argumenteve”, tha Stroni.
Kërkesat e mjekëve:
-Të shpallen dëshmorë të kombit të gjithë ata pjesëtarë të personelit shëndetësor të cilët humbin jetën në këtë luftë me këtë armik të padukshëm
-Të bëhet sigurimi i jetës së personelit shëndetësor, me qëllim që familjet e tyre të mund të vazhdojnë jetën edhe pas fatkeqësive të mundshme në këtë luftë.
-Rritje të vlerësueshme e trajtimit financiar të personelit shëndetësor.
-Personeli shëndetësor të çdo niveli t’i sigurohen të gjitha kushtet optimale në punë për parandalimin e infeksionit sipas të gjitha standardeve kombëtare dhe ndërkombëtare. /Ra.My.Fjala.al/
