Portieri dhe i riu i Juventusit pritet të jenë gati për dy sfidat e radhës. Pas anulimit të miqësores së 7 tetorit me Armeninë, Kombëtarja shqiptare ka vijuar përgatitjet dhe, të martën pasdite ka zhvilluar në Durrës seancën stërvitore të radhës.
Siç dihet, lista e trajnerit Edoardo Reja për dy ndeshjet e Ligës së Kombeve ndaj Kazakistanit dhe Lituanisë ka pësuar ndryshime për shkak të pasojave të epidemisë së Covid-19 dhe problemeve që janë hasur me klubet.
Kështu, Ylber Ramadani, Florian Kamberi, Lindon Selahi dhe Klaus Gjasula me shumë gjasa nuk do të jenë të gatshëm për dy ndeshjet e radhës, pasi nuk lejohen nga klubet të dalin jashtë vendeve përkatëse. Edhe portieri Thomas Strakosha ka shfaqur probleme fizike dhe është në pikëpyetje për ndeshjet e mestetorit dhe, për këtë arsye, trajneri Reja ka vendosur të thërrasë portierët Alban Hoxha dhe Gentian Selmani.
Ndërkaq, probleme fizike vazhdon të shfaqë edhe mbrojtësi Jon Mersinaj, i cili është duke u monitoruar vazhdimisht nga stafi mjekësor. Ndërkaq, lajmi i mirë për Rejën është se Etrit Berisha, por dhe Xhakomo Vrioni, mund t’i bashkohen të mërkurën mbrëma ose të enjten në mëngjes grupit kuqezi për dy ndeshjet e radhës. Të mërkurën do të zhvillohen dy seanca stërvitore.
La.Mi/Fjala.al
