Milan e nisi kampionatin italian në mënyrën më të mirë të mundshme duke rrëmbyer tre fitore në po tre ndeshje, ndërsa ndodhet në krye të renditjes bashkë me Atalantën, me nga 9 pikë secila.
Por java e katërt e Seria A i vendos kuqezinjtë në një test jo të lehtë, pasi më 17 tetor do të kenë derbin e Madoninës përballë Interit.
Trajneri Stefano Pioli do të ketë në dispozicion edhe tre lojtarë mjaft të rëndësishëm të formacionit në përballjen ndaj zikaltërve. Bëhet fjalë fillimisht për kapitenin Alessio Romagnoli, i cili i mungon skuadrës që nga fundi i sezonit të kaluar, ndërsa tani ka lënë pas dëmtimin dhe duket se po rikuperohet me ritëm të shpejtë për të qenë gati për tu aktivizuar në derbi që nga minuta e parë.
Në repartin e mbrojtjes, momentalisht në dispozicion janë vetëm Simon Kjaer dhe Matteo Gabbia, ndaj rikthimi i Romagnolit do të përforconte prapavijën e kuqezinjve.
Ndërkohë pritet rikthimi në sulm i titullarit Zlatan ibrahimovic. Gjigandi suedez është ende i izoluar për shkak të koronavirusit, dhe ndonëse pa simptoma, ai nuk mund të stërvitet derisa të shërohet plotësisht.
Pioli shpreson se Ibra do të nisë me stërvitjen në fillim të javës së ardhshme, për të qenë gati për derbin e fundjavës. Rikthim i rëndësishëm është edhe ai i sulmuesit kroat Ante Rebic, i cili pritet të konfirmohet nëse do të luajë që nga minuta e parë apo do ta nisë nga pankina.
Fj.Ak/Fjala.al
