Vendimi për rritjen e pagës së personelit shëndetësor në Shqipëri me 40% u shoqërua me polemika të shumta e paqartësi lidhur me kategoritë që trajtohen si dhe me shumën që do të përfitonin. Në një prononcim për gazetën “Fjala”, ish-ministri i Shëndetësisë, Beqja, tregon me shifra se si do të jetë rritja e pagave për secilën kategori që nga mjekët dhe infermierët në spitale deri tek ata në qendrat shëndetësore, teksa thekson se ky vendim do të ndihmojë në frenimin e largimit të mjekëve jashtë vendit.
Nga Ina Allkanjari
Në janar të 2021-shit hyn në fuqi vendimi për rritjen e pagave për personelin shëndetësor dhe për punonjësit e arsimit parauniversitar në vend. Kryeministri Edi Rama bëri të ditur se për personelin shëndetësor do të aplikohet rritje page në masën 40%, ndërsa për punonjësit e arsimit do të procedohet me një rritje prej 15%.
Ky vendim u shoqërua me konfuzion nga ana e Sindikatës së Punonjësve të Shërbimit Shëndetësor. Kryetari i Sindikatës, Gentian Stroni, u shpreh se kjo rritje duhet parë se si do të përkthehet në kategoritë e ndryshme të punonjësve të sistemit shëndetësor. Në një prononcim për gazetën “Fjala”, ish-ministri i Shëndetësisë, Beqja, tregon kategoritë përfituese të mjekëve dhe infermierëve nëpër spitale, si dhe të bluzave të bardha në qendrat shëndetësore. Beqja shprehet se vendimi i rritjes së pagës për personelin shëndetësor me 40% është pozitiv dhe se do të sjellë benefite për sa i përket uljes së numrit të mjekëve të cilët largohen nga Shqipëria.
“Është një vendim pa dyshim pozitiv. Rritje e ndjeshme që përmirëson së pari jetesën e familjeve të personelit mjekësor, së dyti, dinjitetin e personelit mjekësor dhe besoj se do të ndihmojë në frenimin e largimit të mjekëve jashtë vendit”, deklaron Beqja për gazetën “Fjala”.
Ish-ministri i Shëndetësisë shpjegon se kategoritë përfituese do të jenë mjekët që shërbejnë në spitale, farmacistët në spitale, infermierët në spitale, infermierë në qendrat shëndetësore, si dhe mjekët që shërbejnë në qendrat shëndetësore të vendit.
Beqja tregon me shifra se si do të jetë rritja e pagave për secilën kategori nga mjekët dhe infermierët në spitale deri tek ata në qendrat shëndetësore.
Kategoritë përfituese
Ish-ministri i shëndetësisë, Ilir Beqja, shpjegon se paga mesatare e mjekëve në spitale nga 915 dollarë në muaj do të shkojë në 1280 dollarë në muaj. Pra, do të shoqërohet me një rritje prej 365 dollarësh në muaj, çfarë do të thotë se paga mesatare e kësaj kategorie do të pësojë një rritje prej 4395 dollarësh në vit.
Sipas Beqjas, kjo rritje reflektohet me 17585 dollarë shtesë në pagë për 4 vjet. Më tej ish-ministri i Shëndetësisë ndalet te një tjetër kategori përfituese, e cila përfshin farmacistët në spitale. Ai thekson se për ketë kategori paga mesatare do të shkojë nga 595 dollarë në muaj në 835 dollarë në muaj. Sipas tij, kjo rritje do të sjellë 2845 dollarë më shumë në vit, ose 11380 dollarë më shumë në 4 vite për këtë kategori përfituese.
Për sa u përket infermierëve të cilët shërbejnë në spitale, Beqja shprehet se paga mesatare do të shkojë nga 505 dollarë në muaj në 705 dollarë në muaj. Në një periudhë 4-vjeçare kjo kategori do të përfitojë në total 9680 dollarë më shumë në pagë. Ndërkohë infermierët në qendrat shëndetësore do të përfitojnë rritje, e cila do të reflektohet me 7940 dollarë shtesë në total në pagat e tyre, për një periudhë 4-vjeçare.
Sipas Beqjas, paga mesatare e kësaj kategorie, me hyrjen në fuqi të vendimit për rritjen e pagës, do të shkojë nga 415 dollarë në muaj në 580 dollarë në muaj. Përfitues të rritjes së pagës do të jenë edhe mjekët që shërbejnë në qendrat shëndetësore, sipas ish-ministrit të Shëndetësisë, paga mesatare e tyre do të shkojë nga 755 dollarë në muaj në 1055 dollarë në muaj, pra do të shoqërohet me një rritje prej 300 dollarësh në muaj. Beqja shprehet se rritja e pagave të personelit shëndetësor me 40% do të kushtojë rreth 5,4 miliardë lekë në vit, apo rreth 50 milionë dollarë në vit.
Vendimi
Kryeministri Edi Rama, dy ditë më pare, gjatë një konference për shtyp, lajmëroi se pagat për mjekët do të rriten me 40 për qind dhe ato të arsimtarëve me 15 për qind. Një vendim ky që pritet të hyjë në fuqi më 1 janar të vitit 2021. Rama theksoi se, pavarësisht shtrëngesave të krijuara nga dy goditjet, tërmeti dhe Covid-i, ësëhtë vendosur që këto dy kategori të shpërblehen.
Një vendim i cili, sipas Ramës, nxit motivimin dhe rrit cilësinë e këtyre dy shërbimeve jetike për vendin. Ndërkohë ministrja e Financave, Anila Denaj, deklaroi se në sistemin shëndetësor do të përfitojnë 18415 punonjës, prej të cilëve 4650 mjekë dhe 13765 infermierë, sikurse dhe 35883 punonjës të sistemit parauniversitar të arsimit.
Denaj tregon shumat për secilën kategori: “Në sistemin shëndetësor paga për funksion në nivel mesatar, sot është 57000 lekë, me një rritje 40% në 2021-in shkon 79800 lekë. Paga për funksionin e infermierëve dhe laborantëve, sot është 37000, me rritjen në 40%, shkon 51810 lekë në vitin 2021. Paga mesatare bruto e mjekëve në 2020 së bashku me rritjen shkon nga 37753 në 110553 lekë. Paga mesatare bruto e infermierëve nga 50890 shkon 65700 lekë”. Për sa u përket mjekëve në shërbimin spitalor, Denaj shprehet se rritja është në nivelin e 61,6% nga viti 2013 në vitin 2021, ndërsa për sa u përket pagave të infermierëve, rritja është në nivelin e 68,3% nga viti 2013 në vitin 2021 dhe infermierët në shërbimin spitalor përfitojnë një rritje prej 63,4% me bazë krahasueshmërie vitin 2013 dhe vitin 2021.
Më tej ministrja theksoi se për sa i përket sistemit arsimor parauniversitar, në vitin 2020 punonjësit e arsimit kanë një pagë mesatare 65800 lekë që së bashku me rritjen shkon në 72000 lekë në 2021-shin. Paga mesatare bruto e mësuesve nga 68800 shkon në 75550 në 2021-shin.
Ministrja e Fiancave thekson se pagat e mësuesve nga viti 2013 në vitin 2021 janë rritur në nivel 21,6% dhe ato të mësuesve të shkollave të mesme me një nivel rritjeje prej 21,3%.
Beqja: Kategoritë përfituese në sistemin shëndetësor
-Mjekë në spitale: Paga mesatare, nga 915 USD në muaj në 1280 USD në muaj.
-Farmacistë në spitale: Paga mesatare, nga 595 USD në muaj në 835 USD në muaj.
-Infermierë në spitale: Paga mesatare, nga 505 USD në muaj në 705 USD në muaj.
-Infermierë në qendra shëndetësore: Paga mesatare, nga 415 USD në muaj në 580 USD në muaj.
-Mjekë në qendra shëndetësore: Paga mesatare, nga 755 USD në muaj në 1055 USD në muaj.
Pagat në sistemin arsimor parauniversitar
Në vitin 2020 – paga mesatare 65800 lekë
Në vitin 2021 – paga mesatare 72000 lekë
Paga mesatare bruto e mësuesve
Nga 68800 lekë shkon në 75550 lekë
Re.Gu/Fjala.al
