Organizata Botërore e Shëndetit ka mbajtur një konferencë për shtyp ditën e hënë në Gjeneva, ku ka bërë me dije të rejat e fundit që janë mësuar rreth koronavirusit që ka përfshirë botën, Covid-19.
Kreu i OBSH, Adhanom Ghebreyesus është shprehur se bazuar në të dhënat që janë raportuar, rezulton se shumë persona të cilët e kanë kaluar Covid-19 janë riinfektuar sërish.
“Kanë ekzistuar disa shembuj ku njerëzit e infektuar me Covid-19, janë infektuar për herë të dytë. Shumica e njerëzve që janë infektuar me virusin zhvillojnë një përgjigje imune brenda javëve të para, por ne nuk e dimë se sa e fortë ose qëndrueshme është ajo përgjigje imune, ose si ndryshon për njerëz të ndryshëm.”, u shpreh Ghebreyesus.
Ndërsa gjithashtu kreu i OBSH-së hodhi poshtë dhe strategjinë se popullata mund të imunizohet duke u ekspozuar ndaj viruseve, pra të ashtuquajturën ‘imuniteti i tufës’.
“Imuniteti i tufës është një koncept i përdorur për vaksinimin, në të cilin një popullatë mund të mbrohet nga një virus i caktuar nëse arrihet të vaksinohet”, shtoi ai.
Që nga shpërthimi i pandemisë së Covid-19 deri më tani janë infektuar 38.116.701, nga të cilët 1.086.575 kanë humbur jetën, ndërsa 28.644.528 janë shëruar./Re.Gu/Fjala.al
