Trajneri Edy Reja ka folur për mediat para sfidës së nesërme ndaj Lituanisë në Ligën e Kombeve.
Reja ka vlerësuar maksimalisht skuadrën kundërshtare, por shtoi se Kombëtarja jonë është aty për t’i vënë ata në vështirësi. Ai iu rikthye edhe njëherë sfidës mes dy kombëtareve në Tiranë, ku Lituania triumfoi me rezultat minimal.
“Performanca e Lituanisë në ndeshjen ndaj Shqipërisë ka qenë shumë e mirë. Kanë ushtruar presing të vazhdueshëm duke i hequr iniciativën ekipin tonë. Presingu në rritje dhe gabimet tona individuale shkaktuan pësimin e golit. Gjithsesi jemi të vetëdijshëm se është një ekip me aftësi të larta teknike dhe do të mundohet që të njëjtën gjë ta ushtrojë dhe nëser. Do të përpiqemi që të gjejmë pikat më të dobëta të tyre duke ushtruar presionin tonë dhe duke shfrytëzuar anët tona më të forta, për të arritur në objektivin tonë që është fitorja e ndeshjes.”, u shpreh Reja.
Tekniku gjithashtu ka treguar edhe arsyen pse ka grumbulluar një numër të lartë lojtarësh të rinj në Kombëtare.
“Ekipi aktualisht ka 10 lojtarë të fituar, 10 lojtarë të rinj, 10 emra që janë ndjekur ngushtë nga stafet teknike dhe e meritojnë këtë grumbullim. Lojtarë të cilët kanë potenciale dhe aftësi shumë të mira. Eksperienca nuk janë vitet. Pasioni dhe kualitetet mund të shprehen edhe në moshën 20 vjeç, është çështje besimi dhe se sa ti dëshiron të japësh në fushë. FSHF ka një program për të futur brezat e rinj si pjesë integrale e Kombëtares. Unë kam menduar ta bëja këtë hap mbas hapi, por kushtet më sollën që të merrja një numër kaq të lartë lojtarësh të rinj”, theksoi Reja.
Deri tani Kombëtarja jonë numëron një fitore, një humbje dhe një barazim në Ligën e Kombeve respektivisht ndaj Bjellorusisë, Lituanisë dhe Kazakistanin. Kuqezinjtë ndodhen në vendin e dytë të grupit C, me numër të barabartë pikësh me kundërshtarët.
Pa.Va/Fjala.al
