Në vitin 2009 një nga ngjarjet më të rëndësishme nuk u bë publike ishte përgatitja e një operacioni të policisë për të mos ndërhyrë në fshatin Lazarat i cili ishte kthyer në një ishull të kultivimit të kanabisit. Pas 11 vjetësh ish-drejtori i përgjithshëm i policisë së Shtetit Ahmet Prençi deklaron se ka qenë vendimi i tij për të mos ndërhyrë. Gjatë emisionit HARD TALK NGA ROLAND QAFOKU Prençi tha se nëse policia do ndërhynte do kishte pasoja me vrasje policësh dhe qytetarësh.
-Ju i keni lejuar oficerët e policisë për të ndërhyrë në Lazarat?
-Në vitin 2008 nga statistikat e policisë italiane janë sekuestruar gjatë gjithë vitit 4 kg kanabis sativa. Në 2009 që ka qenë vit elektoral janë kaluar 160 kg kanabis sativa në mos gaboj. Se shtrohet problemi që ka qenë fenomen. Të paktën në 6 ose 7 javë të vitit 2016 kanë kaluar 65 tonë kanabis sativa për në Itali. Tani gjithë këto të ardhura, ku shkojnë? Me këto të ardhura krimi i organizuar ble pushtet, ble drejtësinë, zgjeron hegjemoninë e vet në territore të caktuara të vendit. Dhe është një situatë e jashtëzakonshme për shqiptarët. Sepse biznesi i ndershëm konkurrohet nga një trafikant droge. Lazarati ishte një vatër shumë problematike dhe për ne. 100 tonë që tha Saimir Tahiri që u gjendën në Lazarat pse ishin të magazinuara? Duhet të kishin vajtur në destinacion.
-Domethënë e keni penguar ju?
-Jo penguar. Aty është shtruar një problem për të bërë ndërhyrje në Lazarat por unë në planin e operacionit kam parashikuar dhe pasoja që mund të vinin.
-Pasoja domethënë vrasje?
-Vrasje policësh, vrasje qytetarësh, dhe u mor vendimi për të mos ndërhyrë.
-Kush e mori vendimin?
-Po sigurisht që unë e mora vendimin në konsultë me ekspertët ndërkombëtarë.
-A quhet gabim ky?
-Unë nuk e konsideroj gabim.
-Pse?
-Sepse ne bëmë tjetër gjë. Izoluam gjithë zonën dhe çdo ngarkesë që ka dalë nga Lazarati është kapur nga Policia e Shtetit./Fjala.al/Ke.Ba
