Deputeti i Kuvendit Halit Valteri ka folur me tone të ashpra gjatë fjalës së tij nga foltorja e Kuvendit ku ka hedhur akuza për “trekëndëshin e korruptuar” siç i ka cilësuar ai Rama-Basha-Meta.
Ndër të tjera në fjalën e tij Valteri tha se Meta është kryetari i opozitës, ndërsa ju drejtua qytetarëve që të mos besojnë çdo gjë që thotë Basha se siç cilëson ai Rama e ka shumë xhan. Ai tha se kjo treshe janë oligarkët e vërtetë të këtij vendi të cilët kanë varfëruar shqiptarët.
“Rama-Basha-Meta, kjo treshe betohet se këtë vend do e çojnë përpara po sa mbarojnë numërimin e kutisë së fundit të votimeve e katandisin këtë vend siç e shihni dhe vetë ku të gjithë janë të pakënaqur nga ecuria e këtij vendi.
Unë e them me bindje se Meta është kryetar i opozitës, ndërsa Rama që bën rolin e avokatit ndaj tyre dihet se kush janë bashkëpunëtorët e tij më të ngushtë. Nuk janë shumë, janë ata që ndajnë përfitimet e tyre.
Po të dojë kryeministri ja kujtojmë edhe me emra se kush janë dëmtuesit më të mëdhenj të kësaj ekonomie. Nuk kam asgjë ndaj biznesmenëve të rregullt të këtij vendi. Kur flasim për oligarkë janë po këta që ndajnë të njëjtin shtrat me Ramën, Bashën, Metën”, u shpreh Valteri.
Më tej ai theksoi në fjalën e tij se “Strukturimi i këtyre oligarkëve nxjerr në pah trekëndëshin e çdo të keqe për shqiptarët. Në çdo vend shqiptarët flasin vetëm për ta Rama-Basha-Meta.
E kanë kthyer vendin në një çiflig për veten e tyre, ndërsa shqiptarët varfërohen dhe përfundojnë në kushte të minimumit jetik”.
Halit Valteri akuzon se oligarkët janë ata vetë, treshja që tallen me shqiptarët nga mëngjesi deri në darkë. “Mos i merrni të mirëqena ato që thotë Basha se Rama e ka shumë xhan atë ashtu siç e ka thënë dhe vete. Kjo është maska që duhet të çirret para të gjithëve.
Një realit aq sa i hidhur dhe poshtërues për qytetarët të cilët kanë shansin për tu distancuar nga trekëndëshi i djallit në 25 prill. Shqipëria ju përket juve dhe jo këtyre, bashkohuni njëherë të vetme për të drejtat tuaja”, përfundoi fjalën e tij Valteri./Bl.Ba/Fjala.al
