Komisioni për Sigurinë Kombëtare ka miratuar në parim ndryshimet në Kodin Penal që ashpërson dënimet për ndërtuesit. Ky rregullim ligjor i ligjvënësve do t’i kushtojë rëndë atyre që shkelin rregullat.
Më konkretisht është parashikuar se për ndërhyrjet në banesa ekzistuese që rrezikojnë shembjen e pjesshme apo të plotë të saj dënohen me gjobë deri në 5 vite heqje lirie dhe kur ka pasoja të rënda materiale, heqja e lirisë shkon nga 5 deri në 10 vite.
Ashpërsimi më i madh për këtë çështje është kur ka pasoja në jetën e njeriut dhe dënohet nga 7 deri në 15 vjet burgim.
Ndërsa për ndërtimet e reja, dënimi penal do të jetë për të gjithë zinxhirin e ndërtimit që shkelin standardet dhe dënimi është parashikuar nga 1 deri në 5 vite burg. Edhe pronari, apo siç njihet ndryshe ndërtuesit, dënohen po kaq në rast se nxisin edhe nëpërmjet parave që ndërtimi të bëhet jashtë kritereve teknike.
Nisma ligjore erdhi pas dëmtimeve të mëdha që patën banesat nga tërmeti i 26 nëntorit 2019, ku humbën jetën 51 qytetarë dhe është parashikuar që ndëshkimet ndaj personave që nuk zbatojnë standardet e ndërtimit të shkojnë deri në 15 vite heqje lirie.
Por, ndërkohë që për ndryshimin e ligjit po punohet në drejtimin e duhur, për hetimet e pasojave të tërmetit të një viti më parë ende nuk ka asnjë përfundim.
Gjithçka duket se edhe këtë herë, si shumë probleme të tjera, do të kalojë në heshtje pavarësisht se humbën jetën 51 persona, shumica e të cilëve mund të ishin shpëtuar nëse ligji ekzistues do të zbatohej./Bl.Ba/Fjala.al
