Kryeministri Edi Rama, i shoqëruar nga ministri Arben Ahmetaj, ka vijuar inspektimet në kantierin e Rindërtimit në Vorë.
Ahmetaj tha se këtë javë do të rrëzohen të gjitha pallatet e vlerësuara për tu shembur, për shkak të dëmtimeve të marra nga tërmeti i 26 nëntorit.
“Këtë javë rrëzohen të gjitha pallatet që janë vlerësuar si DS5. Aty nis dhe Bulevardi i ri i Vorës. S’ka probleme si Durrësi. Pasi janë më të lehta për t’u shembur.
Sot Fondi Shqiptar i Zhvillimit do të nxjerrë fituesit për dy pallatet në Durrës. Që nga sot kemi një bashkim operatorësh që do të dalin nga ky proces. Do të nisin punën për pallatet që javës që vjen, do nisin me themelet”, tha Ahmetaj.
Ndërsa sipas Ramës, 404 janë familjet që humbën apartamentet dhe shtëpitë natën e 26 nëntorit “e sot vazhdojnë të jetojnë me qera të paguara nga qeveria deri në përfundim të rindërtimit, do të kthehen në një shtëpi më të bukur e më të fortë dhe në një lagje shumë herë më të bukur e më miqësore për të gjitha moshat”.
Deri tani, në Vorë është realizuar infrastruktura nëntokësore dhe në kopshtin “Muçaj”, që do të hapë dyert për fëmijët në 26 nëntor./Bl.Ba/Fjala.al
