Presidenti Ilir Meta ka dekoruar pas vdekjes me një ceremoni solemne futbollistin e njohur të Lushnjës dhe të Ekipit Kombëtar, Abdurrahman Roza Haxhiu, me titullin ‘Kalorës i Urdhrit të Flamurit’.
Në fjalën e tij, drejtuar familjarëve, ish-kolegëve dhe personaliteteve të tjera të sportit, Kreu i Shtetit u shpreh se ishte privilegj dhe kënaqësi të vlerësonte me Titullin e lartë “Kalorës i Urdhrit të Flamurit”, Abdurrahman Roza Haxhiun për kontributin dhe rezultatet e shkëlqyera të arritura në sport.
Abdurrahman Roza Haxhiu nisi karrierën e tij futbollistike në vitin 1947 te ekipi i të rinjve të Lushnjës, në atë kohë i quajtur “Traktori Lushnjë”, pasi ra në sy të trajnerit Dilaver Toptani. Ai qëndroi te Lushnja deri në vitin 1949 para se të kalonte për një periudhë të shkurtër te Besa.
Në vitin 1951, ai u transferua te Partizani ku do të kalonte një periudhë të suksesshme, duke fituar kampionatin tre herë rresht si dhe kupën dy herë. Ai qëndroi te Partizani për shumicën e karrierës së tij, nga viti 1951 deri në vitin 1958 kur fitoi dhe medaljen e argjendtë në Laipzig. Pas Partizanit, ai u transferua dhe qëndroi te Dinamo për 1 vit ku dhe mbylli karrierën e tij si futbollist./Re.Gu/Fjala.al
