Kreu i Partisë Demokratike Lulzim Basha ka reaguar pas deklaratës së Komisionerit për Zgjerimin Oliver Varhelyi, i cili tha se Kuvendi duhet të presë mendimin e Komisonit të Venecias për ndryshimet në Kodin Zgjedhor. Basha, teksa lexoi live reagimin e Komisonerit, e përshëndeti atë, ndërsa shpreson që “Venecia” të ndërhyjë.
“Përshëndes deklaratën e komisionarit rishpreh shqetësimin e thellë për shkatërrimin e klimës parazgjedhore dhe përpjekjen e Ramës për të manipuluar sistemin. Dhe përsëris qëndrimin e PD që kjo është një goditje e rëndë dhe përgjegjësi është një, ai që ka vënë xhepat e tij para shqiptarëve tani po vendos pushtetin para interesave të vendit. E mbështes këtë apel të komisionari dhe shpresoj që Venecia të ndërhyjë për të treguar atë që ne demonstruam gjatë këtyre muajve”, tha Basha.
Më tej teksa foli për buxhetin e shtetit Basha deklaroi se ka para mjaftueshëm që vendi të përballet me krizën për shkak të pandemisë së COVID-19.
“Numri i te prekurve është më i lartë. S’ka vend në Europë që të shpenzojë siç shpenzon Edi Rama për 10 ose 12 shokët e tij, vetëm atyre iu ka rezervuar 1/10 e prodhimit të brendshëm të Shqipërisë. Rama është i vendosur që t’i shkojë kësaj deri në fund. Ai do të vazhdojë me vjedhje, do të bëjë gjithçka që tenderat të bëhen sekret, pa transparencë.
Ndërkohë që edhe ato testime që bëhen, bëhen me pajisje dhe kite të dhuruara nga partnerët. Dua t’ju shpreh falënderimet e mua SHBA, e vendeve të tjera aleate, se kushedi se çfarë do të ndodhte këtu. Ky njeri duhet të largohet, siç shqiptarët mezi po presin që ta largojnë”, u shpreh Basha.
Ai tha se tashmë SPAK i ka në dorë provat për rastet e vjedhjeve dhe për këtë fakt ky institucion duhet të veprojë menjëherë.
“Unë do të bëj detyrën time për të treguar se çfarë do të bëjë qeveria. Ndaj përsëris për organet e drejtësisë, nuk mjaftojnë deklaratat dhe hapat e breshkës, pasi çdo ditë që ju nuk bërtisni, ju po inkurajoni vjedhjen. Ju duhet ta shkurajoni vjedhjen, largimin e parave nga këta njerëz të grupeve të strukturuar.
Merrni në pyetje, thirrini në SPAK. Korrupsioni është ashiqare, është e vetmja mënyrë që mos të livadhisen. Provat i keni. S’ka shqiptar që si kupton. Çfarë prisni?! Do të jetë vonë nëse deri në ditët e fundit kjo bandë do të përgjakë biznesin dhe numri i viktimat të rritet. Keni detyrimin që të respektoni dhe të veproni sot.” përfundoi Basha./Bl.Ba/Fjala.al
