Policia ka vënë në pranga drejtorin e Hidrokarbureve, Klodian Gradeci. 45-vjeçari u arrestua në kuadër të operacionit të koduar “Akciza”.
Ai u arrestua mbrëmjen e djeshme në Rinas teksa ishte kthyer nga Turqia.
“Në vijim të punës për kapjen e personave të shpallur në kërkim në kuadër të operacionit policor të koduar “Akciza”, i finalizuar më datë 06.10.2020, për goditjen e veprimtarisë kriminale në fushën e kontrabandës me mallra për të cilat paguhet akcizë, nga strukturat e DVP Tiranë u bë kapja dhe ndalimi i shtetasit Klodian Gradeci 45 vjeç, të cilit Gjykata e Shkallës së Parë Tiranë i ka caktuar masën e sigurimit “Arrest në burg”, për veprën penale “Shpërdorimi i detyrës“- njofton policia.
Burime për “Fjala” bëjnë me dije se sipas të dhënave në sistemin TIMS, Gradeci ishte larguar në drejtim të Turqisë, vetëm një ditë para se prokurori Julian Xhengo të firmoste fletë-arrestet për 7 zyrtarë të AKBN-së, si dhe dy biznesmenë.
Dëmi që ka pësuar në mënyrë të drejtpërdrejtë AKBN nga veprimet e kundraligjshme të punonjësve të saj, me në krye titullarin Klodian Gradeci, është 1.472.766 USD, të cilat më pas sollën dhe një ndjekje të çështjes dhe nga hetues amerikanë.
Lidhur me rastin, materialet i kaluan Prokurorisë së Rrethit Gjyqësor Tiranë, për veprime të mëtejshme./Bl.Ba/Fjala.al
