514 raste të reja me COVID dhe tre viktima janë shënuar në 24 orët e fundit në Kosovë.
Lajmi është konfirmuar nga Instituti Kombëtar i Shëndetësisë Publike (IKSHPK), i cili theksoi se kjo është shifra më e lartë e infektimeve brenda një dite që është regjistruar në Kosovë.
IKSHPK-ja tha se tre persona kanë humbur jetën si pasojë e koronavirusit, duke e çuar numrin e përgjithshëm në 681 viktima.
Janë testuar 1,750 persona, ndërsa kanë rezultuar pozitiv 514.
Prej muajit mars e deri me datë 31 tetor në Kosovë janë regjistruar 19,842 raste me COVID.
Prej tyre, 15,520 pacientë janë shëruar, ndërkaq raste aktive janë 3,641.
Për shkak të rritjes së rasteve me koronavirus, Ministria e Shëndetësisë e Kosovës, më herët gjatë ditës njoftoi për masa të reja kundër koronavirusit.
Ndër masat e reja janë kufizimi i veprimtarisë së qendrave tregtare dhe sektorit të gastronomisë nga ora 21:00 deri në orën 05:00. Po ashtu, personat mbi 65 vjeç do të kenë orar të lëvizjes. Ata mund të dalin nga ora 06:00 deri në orën 10:00 si dhe nga ora 16:00 deri në ora 19:00.
Ministri i Shëndetësisë, Armend Zemaj tha se masat e reja do të rishqyrtohen pas dy jave, varësisht nga situata epidemiologjike./Re.D/Fjala.al
