Vjosa Osmani ka marrë ditën e sotme zyrtarisht funksionin e ushtruesit të detyrës së presidentes së Kosovës, pas dorëheqjes së Hashim Thaçit.
Në përputhje me obligimet kushtetuese, pas dorëheqjes së presidentit të vendit, kryetarja e Kuvendit të Kosovës do të ketë në dorë fatin e institucionit më të lartë të vendit, siç është presidenca.
Ceremonia është bërë në prezencën e stafit të presidencës dhe kryetares së Kuvendit të Kosovës. Dorëzimi i kompetencave për ushtrimin e detyrës së presidentes për Vjosa Osmanin nuk është bërë nga Thaçi, pasi ky i fundit ka qenë në zyrat e EULEX.
Hashim Thaçi dha dorëheqjen nga posti i Presidentit të Kosovës, ‘live’ gjatë një deklarate për mediat ku bëri me dije se Gjykata Speciale i kishte konfirmuar akt-akuzën për krime lufte.
“Siç kam premtuar, nuk do të lejoj në asnjë rrethanë që para Gjyqit të dalë presidenti i Republikës së Kosovës prandaj për të mbrojtur integritetin e Presidencës së Republikës së Kosovës, integritetin e shtetit të Kosovës, integritetin dhe dinjitetin e qytetarit të Kosovës, popullit të Kosovës, duke respektuar dhe partneritetin me bashkësinë ndërkombëtare, unë sot jap dorëheqjen nga pozita e presidentit të Republikës së Kosovës”, tha Thaçi në deklaratën e tij./Re.D/Fjala.al
