Është shtyrë seanca e parë në gjykatën e Apelit të Posaçëm për Arbër Cekaj dhe Donaldo Lushaj dhe Armando Pezakun për trafikimin e 613 kg kokainë nga Kolumbia në Shqipëri.
Burime për “Fjala.al” bëjnë me dije se shkak i shtyrjes është bërë mungesa e avokatëve të Arbër Çekajt dhe Donado Lushaj.
I vetmi që ishte paraqitur ishte avokati i Armando Pezakut. Ndërkaq, gjykata vendosi të gjobisë me 50 mijë lekë avokatet Maks Haxhia, Faslli Ceka dhe Dritan Jahaj pasi munguan.
Gjykata do të njoftojë dhe Dhomën Kombëtare të Avokatisë.
Arbër Çekaj ka kundërshtuar vendimin e datës 15 shtator të GJKKO për dënimin e tij me 14 vite burg për 613 kg kokainë të kapur në Portin e Durrësit në vitin 2018.
Në ankimin e dërguar pranë Gjykatës së Posaçme të Apelit për Korrupsionin dhe Krimin e Organizuar, Çekaj kërkon pafajësi duke hedhur poshtë akuzat për trafikim të lëndëve narkotike./ Bl.Ba/Fjala.al
