Djali i aktorit të ndjerë Koço Devole, Genci Devole u shpreh se artisti i njohur iku nga kjo jetë ne një shtëpi me qira, pasi besonte tek drejtësia
Në një prononcim për mediat gjatë homazheve për aktorin, ai thekson se Devole shprehej se një artist s’duhet të ngatërrohet me politikën që të kujtohet si i tillë.
Genci tha se aktori ishte baba i mrekullueshëm dhe një prind i jashtëzakonshëm.
“Ishte një baba i mrekullueshëm. Një prind i jashtëzakonshëm, prind i përkryer. E adhurojnë mbesat dhe nipërit, bashkëshort i devotshëm. Vepra e tij…. më mungojnë fjalët. Një boshllëk i jashtëzakonshëm. Ai besonte se një artist, madje shprehej se një artist s’duhet të ngatërrohet me politikën që të kujtohet si i tillë.
Po i ngatërrove me politikën, do humbasësh vlerat. Iku nga kjo jetë ne një shtëpi me qira, pasi besonte tek drejtësia.Virtyti i kujt është kjo, drejtësia. Mund të jetë virtyt… i drejti mund të jetë. Mund ta quajmë budallallëk drejtësinë. Ai është i pastër dhe i qetë me shpirtin e tij”, u shpreh Genci Devole.
Koço Devole u përcoll të martën në banesën e fundit, ndërkohë që familja mbajti homazhe private me miq e familjarë të afërt.
