Bashkimi Europian ka arritur një marrëveshje me kompaninë amerikane Moderna, për një sasi prej 160 milionë doza vaksinash. Kjo marrëveshje ka çuar rezervat e BE në gati 2 miliardë vaksina.
Javën e kaluar, Moderna njoftoi se vaksina e saj eksperimentale është 94.5% efektive në parandalimin e Covid-19 bazuar në provat klinike.
Në gusht, Komisioni ekzekutiv i BE, i cili bashkëdrejton bisedimet me prodhuesit e vaksinave në emër të vendeve anëtare, tha se kishte zhvilluar bisedime paraprake me Moderna mbi një marrëveshje për 80 milionë doza dhe një mundësi për 80 milionë më shumë.
Kushtet e kontratës nuk janë zbuluar. Zyrtarë të BE kanë deklaruar se shtetet e bllokut po kërkojnë një çmim nën 25 dollarë për dozë për vaksinën e Moderna.
Por shefi ekzekutiv i Moderna, Stephane Bancel u shpreh se kompania do të tarifojë qeveritë midis 25 dhe 37 dollarë për dozë, në varësi të sasisë së porositur.
Brukseli tashmë ka arritur marrëveshje me AstraZeneca, Pfizer-BioNTech, Sanofi-GSK, Johnson & Johnson dhe CureVac. Gjithashtu është në bisedime për të blerë vaksinën e mundshme COVID-19 të firmës amerikane Novavax.
Blerjet aktuale do të kryhen nga qeveritë e BE nëse vaksinat aprovohen nga rregullatori i ilaçeve i BE./Re.D/Fjala.al
