Tre krerët e lartë të shtetit, presidenti Ilir Meta, kryeministri Edi Rama dhe kryeparlamentari Gramoz Ruçi morën pjesën në ceremoninë shtetërore e organizuar për nder të 76-vjetorit të Çlirimit të vendit.
Ashtu si në ditën për Festën e Pavarësisë, tre krerët e shtetit edhe pse ishin bashkë në këtë ceremoni, kjo ishte vetëm formalisht, pasi raportet e ftohta u ndjenë ku nuk pati as përshëndetje ndërmjet tyre.
Pas kësaj ceremonie, kreu i shtetit dha një prononcim për mediat, duke kujtuar edhe një herë aktin heroik të Margarita Tutulanit.
“Më lejoni të kujtoj në histori, ku Margarita i drejtohet vëllait: Përse ne na duhet vëllaçko atdheu? Dhe ai përgjigjet kur të rritesh do ta kuptosh këtë gjë?”, tha presidenti, i cili theksoi se duhet të jemi mirënjohës për epopenë e luftës nacionalçlirimtare.
Kreu i shtetit edhe herët e tjera ka përmendur dëshmoren e atdheut, madje nuk ngurroi e të lëshonte batutën: Dua më shumë Margaritën se sa Monikën (Kryemadhin).
Ndërsa hodhi poshtë se nuk ka dy data për çlirimin e Shqipërisë, duke kundërshtuar tezat, u shpreh se data 29 Nëntor është e provuar edhe nga historiografia shqiptare.
“Për mua nuk ekzistojnë debate për datat, 29 Nëntori ka qenë dhe mbetet një datë e provuar e argumentuar qartë dhe provuar nga historiografia, nuk ka asnjë përpjekje të eklipsojë luftën antifashiste nacionalçlirimtare”, theksoi kreu i shtetit.
Ndërsa nuk ka la pa dhënë mesazhin për zgjedhjet e ardhshme parlamentare. “Jam tepër optimist që shqiptarët e kanë të qartë do të bëhet një ndryshim i jashtëzakonshëm, dhe shqiptarët do të marrin në dorë fatet e tyre”, theksoi presidenti përpara medieve./Bl.Ba/Fjala.al
