Joshua D. Rabinoëitz dhe Caroline R. Bartman janë përkatësisht profesor i kimisë dhe gjenomikës dhe studiuese në të njëjtën disiplinë. Në një editorial të ”New York Times” ata merren me një aspekt që nuk është marrë shumë në konsideratë kur diskutohet rreziku i koronavirusit të ri SARS-CoV-2: sasinë e virusit ndaj të cilit jemi ekspozuar. “Si me çdo helm tjetër, viruset zakonisht janë më të rrezikshëm në sasi më të mëdha. Ekspozimet e vogla fillestare kanë tendencë të çojnë në infeksione të buta ose asimptomatike, ndërsa doza më të mëdha mund të jenë vdekjeprurëse”, shpjegojnë ata. “Hyrja në një ndërtesë ku dikush ka qenë me koronavirus nuk është aq e rrezikshme sa të ulesh pranë atij personi të infektuar për një orë udhëtimi me tren.”
Kjo është arsyeja pse punonjësit e shëndetit (mjekët, infermierët, asistentët por edhe personeli i pastrimit në spitale) janë në mesin e personave më të rrezikuar dhe që duhet të mbrohen siç duhet. Gjithashtu kjo është arsyeja pse distancimi shoqëror dhe masat higjienike janë të rëndësishme: veshja e maskës, larja e duarve dhe veprime të ngjashme, pasi edhe kur nuk mund të mbroheni plotësisht nga virusi, zvogëloni dozën ndaj së cilës ekspozoheni. Kjo do të thotë se duhet kujdes i veçantë për të parandaluar ekspozimin ndaj dozave të larta të SARS-CoV-2, të cilat kanë shumë gjasa të jenë të larta në ndërveprime të ngushta mes njerëzve, siç janë takimet për një kafe, bare të mbushur me njerëz, si dhe qëndrimi në një dhomë me gjyshen dhe prekja e fytyrës së saj, pasi keni marrë një sasi të të konsiderueshme të virusit në duart tuaja, – shpjegojnë dy shkencëtarët.
Ndërveprimet ndërpersonale janë më të rrezikshme në hapësira të mbyllura dhe në një distancë të shkurtër, me një përshkallëzim të dozave që rritet me kohën e ekspozimit. Sa i përket ndërveprimeve kalimtare që shkelin rregullin e mbajtjes së një metri distancë midis tij dhe të tjerëve, si pagesa në supermarket, ato mund të shkelen për afate të shkurtra, duke synuar rregullin “vetëm gjashtë sekonda”.
Në të kundërt, do të thotë që disa gjëra që na frikësojnë mund të jenë më pak të rrezikshme nga sa mendojmë (megjithëse me njohuritë e deritanishme nuk ka siguri absolute). “Rrobat dhe paketimet e ushqimeve që i janë ekspozuar dikujt me virus duket se paraqesin një rrezik të ulët, shtojnë dy studiuesit. Njerëzit e shëndetshëm që janë së bashku me ata të infektuar në dyqanet ushqimore ose në vendin e punës kanë një rrezik të tolerueshëm, për sa kohë që marrin masa paraprake siç janë veshja me maska kirurgjikale dhe largimi”. Këto janë të gjitha indikacionet e përgjithshme që do të nevojiten edhe pasi të ketë mbaruar faza më akute e urgjencës.
Burimi: corriere.it/fjala.al
