42-vjeçari i ekzekutuar në Spanjë në një atentat mafioz është identifikuar si Brandon Bregu nga Lushnja.
Dyshohet se ekzekutimi i tij lidhet me pastrimin e llogarive dhe me operacionin e nëntorit të kaluar ku u arrestuan gjashtë persona për krime të falsifikimit të dokumenteve, trafikut të drogës dhe përfshirjes në një grup kriminal, shkruajnë mediat spanjolle.
Vrasja e Bregut ndodhi dy ditë më parë, pak minuta pas orës 11 në restorantin “The Orange Tree” në El Albir. Sipas dëshmitarëve okularë, një burrë me kapuç iu afrua vendit ku ndodhej viktima me partneren e tij, një grua me kombësi angleze, dhe e qëlloi atë disa herë. Të njëjtët dëshmitarë raportuan se ai kishte përdorur një pistoletë dhe pas të shtënave ai u largua.
Kur arritën agjentët e Gardës Civile, viktima ishte i shtrirë në tokë me pesë plagët e plumbave të dukshme dhe u transferua në një gjendje shumë të rëndë në një spital, por nuk ia doli të mbijetojë.
Policia Gjyqësore e Gardës Civile të Altea ka marrë përsipër hetimin e krimit. Nëntorin e kaluar, në një operacion të përbashkët nga Policia Kombëtare dhe Garda Civile, gjashtë persona u arrestuan në të njëjtën zonë për krime të pretenduara të falsifikimit të dokumenteve, trafikut të drogës dhe përkatësisë në një grup kriminal. Midis të arrestuarve, të cilët u lanë të lirë nga autoriteti gjyqësor, kishte qytetarë të kombësive të ndryshme, njëri prej të cilëve ishte shqiptar.
Aso kohe, u sekuestruan dy automjete luksoze me vlerë deri në 130,000 euro, pajisje elektronike, karta bankare dhe telefona celularë, me një vlerë të përgjithshme prej 170,000 euro.
Vrasja e shqiptarit ndodhi vetëm disa ditë pasi, në një operacion nga Trupat e Policisë Kombëtare, disa anëtarë të një rrjeti rus u arrestuan në Altea, të akuzuar për pastrim parash dhe për përpjekje për tu infiltruar në institucionet publike. Një nga objektivat e kësaj bande ishte instalimi i një kampingu për automjete luksoze në Altea , një distancë e shkurtër nga vendi ku u krye krimi.
