Nga sot deri më datën 4 janar nis zbatimi i masave të reja që ka marrë Komiteti Teknik i Ekspertëve Anti-Covid, për kufizimin e përhapjes së infeksionit. Sot e në vazhdim, ditë që përkojnë dhe me festat e fundvitit nis kufizimi i lëvizjes së qytetarëve nga ora 20.30 e mbrëmjes deri në 06.00 të mëngjesit.
Duke filluar nga këto orare është vendosur të kufizohet edhe aktiviteti i bareve, restoranteve që ofrojnë shërbim për klientët. Ndërkaq mbeten në fuqi edhe masat e tjera, ajo e mos grumbullimit në ambiente me më shumë se 10 persona, vendosja e maskës në të gjitha ambientet, ndërkohë që nxënësit në shkolla marrin pushimet e festave për t’iu rikthyer mësimit në 11 janar.
Të gjitha këto masa sipas ekspertëve janë për të parandaluar përhapjen e virusit Sars Cov2, i cili sipas tyre është në një situatë të qëndrueshme në vend. Por si ka ndryshuar panorama e përhapjes së rasteve të reja që prej fillimit të zbatimit të këtyre masave që nga muaji nëntor?
“Wake Up” ka bërë përllogaritjen e përqindjes së pozitivitetit për tri javët e fundit (nëntor-dhjetor) për të parë impaktin që kanë pasur masat e ndërmarra nga Komiteti i Ekspertëve.
Javët e analizuara janë:
23 nëntor-29 nëntor;
30 nëntor-13 dhjetor
14 dhjetor-20 dhjetor.
Përqindja mesatare e pozitivitetit për këto tri javë ka ardhur në rritje në javën e parë dhe më pas me trend zbritës: ( 30,5% në 36,4%. Ka vijuar me trend zbritës më pas në 27,8%. Ndërkohë në dy ditët e para të kësaj jave më 21 dhjetor ka qenë 22,1% dhe 22 dhjetor ka qenë 16%.
Eugena Tomini, Shefe e Survejancës dhe Shërbimit të Inteligjencës Epidemike në ISHP dhe më tepër detaje në “Wake Up” rreth situatës në vend për shkak të koronavirusit.
“Kemi lëvizjes të kurbës epidemike për sa i përket rasteve të konfirmuara pozitive dhe pozitivitetit brenda numrit të testimeve të përgjithshme, qofshin këto brenda 24 orëve apo të përllogaritura sipas javëve apo në krye të dy javëve.
Bashkëpunimi i epidemiologëve me mjekët e klinikës, apo mjekët e familjes për të alternuar të dy metodat, sigurisht që është një përgjegjësi e madhe dhe varet drejtpërdrejt me klinikën.
Ndryshimet e kurbës epidemike janë karakteristike dhe të lidhura me masat e marra. Nëse do të ishin vetëm masat e ndërmarra, do besoja jashtëzakonisht shumë.
Nuk janë vetëm masat që kanë influencuar në pozitivitet, por është edhe sjellja e virusit kundrejt popullatës. Dhe po ta shohim në harkun e të paktën 3-4 ditor, ne kemi një ulje të pozitivitetit përkundrejt numrit total të testimeve”, bëri të ditur Tomini.
