Operatori i Shpërndarjes së Energjisë Elektrike të enjten reagoi menjëherë pasi Fjala.al publikoi lajmin për mungesën e energjisë elektrike për të 5-tën ditë me radhë në Parkun Kombëtar të Valbonës, në rrethin e Tropojës.
Përmes një njoftimi për mediat, OSHEE thekson se po punohet intensivisht për të bërë të mundur kthimin e energjisë elektrike në disa zona të Tropojës.
“Më poshtë janë foto të dëmëve në rrjetin elektrik Tropojë, shkaktuar nga reshjet e dëborës. Punonjësit janë të angazhuar gjatë gjithë kohës, por në zona të caktuara, shtresa arrin deri në 60 cm që e bën të vështirë operimin në kushte normale”, thuhet në njoftimin e OSHEE-së.
Kujtojmë se Fjala.al ishte një nga mediat e para në vend dhe e vetmja që denoncoi mungesën prej 5-së ditësh të energjisë elektrike në rrethin e Tropojës, pasi mungesa e saj rrezikonte seriozisht shumë biznese agro-kulturore dhe turizmin malor në zonë./Fjala.al/
